Ashtu siç kishin paralajmëruar, banorët e Mbrostarit, njësi administrative në Fier, kanë bllokuar aksin nacional që lidh këtë zonë me Tiranën. Prej disa ditësh, ata janë ngritur kundër ndërtimit të impianit të mbetjeve, pak kilometra larg fshatit të tyre.
Më herët, një përfaqësi e tyre ka zhvilluar një takim me prefektin, Xhevit Bushaj. Por, kanë dalë prej zyrës së tij të pasqaruar, duke bërë që sot të bllokojnë rrugën.
Sipas banorëve, prefekti ka tentuar t’i qetësojë, duke u thënë se projekti nuk do të miratohet dhe se do të rishqyrtonte edhe një herë vendimin e këshillit bashkiak, i marrë pak ditë më parë për ngritjen e impiantit. Pavarësisht këtyre premtimeve, protestuesit kanë kërkuar fakte konkrete për anulimin e këtij projekti, dhe jo vetëm fjalë boshe, siç janë shprehur protestuesit.
Kjo nuk është hera e parë që banorët e fshatit, përfshirë këtu gra e fëmijë të bllokojnë akset nacionale. Ata kanë nisur tubimet prej disa javësh, si dhe kërkojnë ndërhyrjen e autoriteteve vendore dhe qëndrore për zgjidhjen e situatës./tesheshi.com
