Pashko Ujka, ish-kryetar i Komunës së Velipojës nën siglën e demokristianëve, ndërroi jetë në spital pasi luftoi me vdekjen për disa orë, pas një plagosjeje me armë zjarri.
64-vjeçarit iu bë atentat në afërsi të banesës së tij në lagjen “Vasil Shanto” në Shkodër.
Ai u qëllua pas shpine dhe mori plagë në shtyllën kurrizore, por nuk arriti dot të mbijetojë pavarësisht se u nis menjëherë për në spital.
Dyshohet se ngjarja mund të ketë lidhje me periudhën 2011-2015 kur Ujka ka shërbyer si kryetar komune, pasi ai është plagosur edhe dy herë të tjera.
Por njëra pistë është dhe ajo e ndonjë konflikti në biznesit a ndërtimit, pasi ai kishte ndërtuar disa pallate në Shkodër.
Njëherësh, i ndjeri ka qenë dhe deputet në legjislaturën 2005 – 2009, ku nga Aleanca Demokratike kaloi te Partia Demokristiane të Nard Ndokës. /tesheshi.com/
