Rusia garanton kalimin e papenguar të anijeve që transportojnë grurë ukrainas dhe mund të sigurojë eksportin përmes porteve që kontrollon, si Berdyansk dhe Mariupol, tha presidenti rus Vladimir Putin.
Ai tha se Rusia nuk pengon eksportin e drithërave nga Ukraina dhe se kjo mund të bëhet përmes porteve të Detit të Zi dhe vendeve fqinje.
“Për sa i përket eksporteve të grurit të Ukrainës, ne nuk paraqesim asnjë pengesë për këtë”, theksoi Putin, raporton TAS S.
Në një intervistë për kanalin televiziv Rusia 1, ai tha se kjo është e mundur edhe nga porti i Odessa-s nën kontrollin e Kievit, kur Ukraina “pastron ujërat nga minat”.
Kievi mund të eksportojë drithë edhe në rrugë tokësore, dhe mënyra më logjike është Bjellorusia, megjithatë, sanksionet perëndimore duhet të hiqen për atë vend, tha Putin.
Presidenti rus kujtoi gjithashtu se problemet në tregun global të ushqimit filluan në shkurt të vitit 2020 dhe se shkaqet e krizës energjetike qëndrojnë në politikën dritëshkurtër të Perëndimit.
Duke folur për problemet me ushqimin në tregun global, ai përmendi ndër shkaqet “politikën dritëshkurtër të kombeve europiane dhe mbi të gjitha Komisionin Europian në sferën e energjisë”.
“Evropianët kanë shurdhuar kërkesën tonë të fortë për të mbajtur kontrata afatgjata për furnizimin me gaz natyror në vendet evropiane dhe kanë filluar t’i mbyllin ato. Shumë janë ende në fuqi, por kanë filluar t’i shfuqizojnë. Ajo pati gjithashtu një efekt negativ në tregun evropian të energjisë: çmimet filluan të rriten,” tha presidenti rus, sipas TAS S.
OKB-ja ka paralajmëruar se veçanërisht vendet afrikane, të cilat kanë importuar më shumë se gjysmën e konsumit të grurit nga Ukraina dhe Rusia, po përballen me një krizë “të paprecedentë” të shkaktuar nga konflikti. /tesheshi.com/
