Marrëveshja për ndërprerjen e luftimeve në Siri ka nisur të zbatohet më në fund në mesnatën mes së premtes dhe së shtunës.
Siç lajmëron Al Jazeera, orë qetësie kanë pasuar në tërë Sirinë me hyrjen e ditës së shtunë. Eshtë Observatori Sirian për të Drejtat e Njeriut që ka raportuar se në shumë pjesë të vendit ka mbretëruar qetësia pak pas mesnate.
Të njëjtën gjë njofton dhe reporteri i Al Jazeera-s nga Gaziantepi i Turqisë. “Situata është e qetë për herë të parë në shumë vite, dhe armëpushimi po respektohet. Baza ajrore në Latakia, të cilën rusët e përdorin për sulmet ajrore, ishte po ashtu shumë e qetë.
Reporterët e agjencisë së lajmeve Associated Press në kryeqytetin e Sirisë, në Damask, deklaruan se nuk kishin dëgjuar shpërthime që tre minuta para hyrjes në fuqi të armëpushimit.
Ndërkaq, një rezolutë e miratuar më herët nga Këshilli i Sigurimit i OKB-së u kërkon palëve në konflikt t’i përmbahen marrëveshjes së armëpushimit, e të përmbushin angazhimet e tyre në kuadër të ndërprerjes së luftimeve.
I dërguari i posaçëm i OKB-së në Siri, Staffan de Mistura, bëri të ditur se, nëse zbatohet armëpushimi, bisedimet e paqes do të rinisin më 7 mars. /tesheshi.com/
