Një ditë pasi Sllovakia paraqiti një padi në Gjykatën Europiane të Drejtësisë në Luksemburg kundër kuotave të detyrueshme të shpërndarjes së refugjatëve, shembullin e saj e ka ndjekur dhe Hungaria, duke depozituar një ankesë ligjore në të njëjtën gjykatë.
Vendet e BE-së kanë rënë dakort prej kohësh për një shpërndarje të 160.000 azilkërkuesve midis shteteve anëtare, por Hungaria dhe Sllovakia kanë qenë kundër që në krye të herës.
Sipas planit të shpërndarjes, të dy vendet pritet të marrin nga 2.300 refugjatë, një shifër modeste kjo krahasuar me numrin e jashtëzakonshëm të tyre në disa prej vendeve të tjera të BE-së.
Hungaria, Çekia, Sllovakia dhe Rumania votuan kundër planit të shpërndarjes në një takim të BE-së në shtator, por kjo nuk është parë si e mjaftueshme.
“Nuk mjafton të protestosh; duhet të ndërmerren veprime,” deklaroi sot kryeministri hungarez, Viktor Orban. Ai do t’i përshkruante më herët kuotat si ilegale, të paarsyeshme dhe të padrejta. /tesheshi.com/
