Fëmijët mbesin fëmijët, dhe pak argëtim nuk u bën keq as në momentet më të vështira. Nisur nga kjo e vërtetë, një numër i studentëve turq kanë organizuar një festival lojërash për fëmijët sirian të privuar nga argëtimi.
Dyzet e pesë vullnetarë iu bashkuan studentëve në atë që u quajt “Festivali i Kufirit të organizuar nga Shoqata Ndërkombëtare e të Drejtave të Refugjatëve (UMHD).
Ata organizuan aktivitete të mbushura me argëtim si shfaqje teatrale, shfaqje në rrugë, punëtori dhe shfaqje vallëzimi si pjesë e mbrëmjeve që do të zgjasin deri më 21 shtator.
Salih Sari, një student i studimeve islame në Universitetin e Sehir të Stambollit, tha se ai ishte vullnetar në festival për herë të dytë.
“Kam ardhur këtu për të lënë një buzëqeshje të vogël bë fytyrat e fëmijëve, për të lënë kujtime të paharrueshme për ta dhe të jemi pjesë e lumturisë së tyre”, tha ai.
Pavarësisht orëve të gjata të punës, Sari tha që vullnetarët janë shumë të motivuar dhe energjikë.
Fëmijët në shkolla të ndryshme fillore në qytetin veriperëndimor të Azazit të Sirisë gjithashtu morën pajisje shkollore në fund të festimeve.
“Edhe nëse lodhemi, një buzëqeshje e një fëmije është e mjaftueshme për të filluar ditën tjetër me më shumë energji”, tha Muhammet Cevher Bulbul, një tjetër vullnetar nga Stambolli.
Ceyda Yildiz, një studente e psikologjisë në Universitetin e Sehir të Stambollit, tha se ajo u bashkua si vullnetare për shkak të interesit të saj për migracionin e detyruar dhe luftën.
“Ishte një nga ëndrrat e mia më të mëdha derisa erdha këtu. Doja të kisha një perspektivë tjetër, ndryshe nga ato të pasqyruara në media. Doja të kem perspektivën time për këta fëmijë dhe të lidhem me ta”, tha ajo.
Një çift i ri iu bashkua gjithashtu vullnetarëve.
Iskender Tagiyev tha se ai pa detaje të programit vitin e kaluar në mediat sociale dhe vendosi të bashkohej me gruan e tij.
“Ne donim t’i bënim fëmijët të lumtur, as që e dinim se në çfarë gjendje mendore ishin. Ne ishim të befasuar dhe të mërzitur kur e pamë se sa të uritur ishin për argëtim”, tha ai.
Sare Koroglu tha se ajo kishte shumë kushërinj matanë kufirit në Siri, dhe ishte kurioze për prejardhjen e saj.
Gjëja më mbresëlënëse gjatë festivalit janë fëmijët; edhe nëse lëndohen gjatë lojërave duke rënë në tokë ose duke u shtyrë, ata ende vazhdojnë.
Festivali që synon të argëtoj 10,000 fëmijë sirianë do të zhvillojë natën e fundit në kampin e refugjatëve Elbeyli në provincën jugore Kilis.
Ndërsa konflikti në Siri hyri në vitin e nëntë, fëmijët brenda vendit të lodhur nga lufta vazhdojnë të mbajnë barrën e konfliktit. Shumë fëmijë sirianë nuk e kanë njohur kurrë paqen, duke jetuar në kushte të jashtëzakonshme në kampe refugjatësh.
Sipas UNICEF, rreth 5.6 milion fëmijë ende kanë nevojë për ndihmë humanitare në Siri, ndërsa 2.6 milion mbeten të zhvendosur brenda vendit. /tesheshi.com/
