Dëshmia së fundi e një të riu kosovar të kthyer nga Siria se ai ka dëgjuar ligjërata nga hoxhë Fatmir Latifi e Ahmed Kalaja (pa specifikuar gjithsesi që ato kanë qenë burim frymëzimi për të marrë rrugën drejt frontit të luftës atje), kanë sjellë reagimin e hoxhës së njohur nga Mitrovica, ish-ushtar i UÇK-së. Ai vërtet njihet për njeri me temperament të zjarrtë në ligjërimet fetare, por ky është rasti i parë që emri i tij lakohet në publik e media për një çështje të mprehtë si ai i shkuarjes në Siri të një kontigjenti besimtarësh. Pos kësaj, Fatmir Latifaj nuk është përfolur kurrë për ndonjë qëndrim kinse ekstremist. Më poshtë mund të lexoni reagimin e tij në formën e një sqarimi mbi veten dhe përmendjen që i është bërë emrit të tij nga i “penduari i Sirisë”.
“Të gjithë jemi dëshmitarë se lufta kundër dukurive negative nuk është e lehtë, e sidomos kur devijimi ka rrënjë te keqkuptimet në ide dhe botëkuptime. Kësisoj, mbetet sfidë e të gjithëve përballja me ekstremizmin e dhunshëm dhe terrorizmin. Kohëve të fundit kjo është bërë brengë edhe e shoqërisë sonë. Në realitet do të duhej që të gjithë ta bartim barrën e kësaj përgjegjësie, secili nga këndi i vet.
Unë si hoxhë, ish luftëtar i lirisë, aktivist për çështjen kombëtare dhe figurë publike, jam munduar dhe vazhdoj që keqkuptimet fetare t’i izoloj deri në maksimum. Gjithë veprimtaria ime, publike dhe private është vënë në shërbim të ruajtjes së vlerave të Islamit dhe në luftimin e keqkuptimeve të tij.
Jam i vetdijshëm se kjo nuk është gjë e lehtë dhe njëkohësisht po zgjat shumë. Ajo që ditëve të fundit ma ka prish terezinë, është lakimi i emrit tim nga disa portale për gjoja frymëzim të një të riu për të shkuar në Siri për të luftuar atje. Realisht, nuk e kam idenë se kush është ai person që apostrofohet me iniciale, e as çka ka deklaruar ai në gjykatë. Mund edhe të ketë deklaruar diçka të tillë, me qëllim të caktuar apo tendencë.
Fundja, organet e drejtësisë le të merren me vërtetësinë e asaj deklarate, por është zhgënjyese që disa media, që deklarativisht i kanë shpallë luftë “izmave” të ndryshme, të raportojnë me kaq tendencë dhe joprofesionalisht, duke lakuar emrin tim në tituj e nëntituj, duke lënë të kuptohet se u zbulua rekrutuesi, e ai qenkam unë. A thua, në shërbim të kujt janë vënë këta “gazetarë”? A i kanë shpallë luftë ekstremizimit apo atyre që e luftojnë atë, si në rastin tim?
Apo ndoshta është fushatë e ultë qërimi hesapesh në mjegull për të eliminuar figura, për të rrënuar kontribute dhe për të larguar pengesa nga rruga e ekstremistëve të të gjitha llojeve e ngjyrave?! Nuk është e tepërt të deklaroj se unë që prej fillimit, madje edhe atëherë kur shumë syresh nuk i kishin të qarta konturet e ekstremizmit, unë jam pozicionuar qartë kundër shkuarjes së të rinjve tanë në konfliktet jashtë vendit dhe kam kontribuuar konkretisht në këtë drejtim. Nëse dikujt i pengon kjo, le të deklarohet, por jo duke hedhur gurin dhe fshehur dorën, me tendencë të njollosjes së figurës sime.
Jam gjithnjë në shërbim të vendit dhe popullit tim dhe e kam dëshmuar gatishmërinë për të dhënë edhe më të shtrenjtën për lirinë e këtij vendi, andaj përpjekjeve të kujtdo (me apo pa qëllim) për të më prezantuar ashtu si nuk jam, do tu kundërvihem me fjalë, më qëndrime dhe do të kërkoj nga organet e drejtësisë për të luftuar keqpërdorimet dhe ofendimet e tilla.”
Fatmir Xh. Latifaj, Mitrovicë
/tesheshi.com/
