Nga Blendi Gashi
Kryesia e Kuvendit ka thirrur për ditën e hënë seancën e radhës plenare, edhe pse liderët e partive politike nuk janë ulur në tavolinën e bisedimeve dhe vazhdojnë hermetikisht të qëndrojnë pas qëndrimeve të tyre.
Opozita thotë se skenari i tyre do të jetë i njëjtë, do të përdorin çdo mjet për të ndaluar mbajtjen e seanës.
Në anën tjetër, Kryesia dhe grupet parlamentare kanë kërkuar nga organet kompetente të sigurisë që brenda përgjegjësive të tyre institucionale, të krijojnë kushte për mbarëvajtjen e punës në sallën e mbledhjeve plenare të Kuvendit dhe të garantojnë siguri për shëndetin dhe jetën e deputetëve.
Analistët e quajnë të panevojshme thirrjen e seancave të reja kur paraprakisht nuk arrihet një marrëveshje mes subjekte politike.
Do të vazhdojmë të protestojmë brenda Kuvendit
Adonis Tahiri nga Lëvizja ‘Vetëvendosje’, ka thënë për portalin tesheshi.com se opozita e bashkuar është shumë e vendosur në qëndrimet dhe kërkesat e saj dhe nuk do të lejojë zhvillim normal të jetës institucionale, pa i tërhequr marrëveshjet e 25 gushtit dhe marrëveshjen për Demarkacionin me Malin e Zi.
“Pra, ne do të vazhdojmë me çdo kusht të protestojmë brenda Kuvendit, me mjetet dhe metodat tona, deri sa të realizohen këto kërkesa”, ka deklaruar Tahiri.
Edhe lideri i AAK-së Ramush Haradinaj, ka bërë të ditur se opozita do të përdor skenar të njëjtë edhe në seancën e së hënës derisa nuk shfuqizohen marrëveshjet.
“Është situatë e njëjtë, ne jemi të vendosur me kundërshtu zbatimin e këtyre marrëveshjeve. Nuk ka forcë as e Kadri Veselit, as e Kryeministrit Mustafa as e zëvendëskryeministrit Thaçi, nuk ka devijim prej teme, as çaji i parlamentit, as gurët a çka i ka pru ai…”, ka deklaruar Haradinaj, për televizionin publik.
Analisti politik, Faik Krasniqi, thotë se nuk duhet të mbahen seanca të reja derisa nuk ka një marrëveshje paraprake, mes pozitës dhe opozitës, sepse seancat e tilla tash e një muaj po sjellin vetëm teatër dhe cirk, nga kjo klasë politike e papërgjegjshme.
“Qeveria e Kosovës, respektivisht kryeministri Mustafa dhe zv. Thaçi, duhet ta marrin seriozisht këtë gjë, për ta gjetur një zgjidhje me opozitën rreth këtyre marrëveshjeve, në mënyrë që kjo situatë e tensionuar mes pozitës dhe opozitës, nga Kuvendi mos të eskalojë edhe në rrugë, që do të kishte pasoja të paparishikueshme për vendin dhe qytetarët e Kosovës”, ka deklaruar ai. /tesheshi.com/
