Kosova përfundimisht do të ketë prefiksin e saj dhe nuk do të vuajë duke përdorur për telefoninë fikse kodin e Serbisë dhe për telefoninë lëvizëse atë të Motekarlos, Sllovenisë apo edhe Serbisë. Negociatat e zhvilluara në Bruksel, edhe pse mediat serbe po anonçojnë se nuk kanë sjellë përparime, kanë sjellë një rezultat konkret dhe historik.
Delegacioni i Kosovës është kryesuar nga ministrja për Dialogun në Qeverinë e Kosovës, Edita Tahiri, e cila deklaroi sot se, në këtë raund të bisedimeve në mes të Kosovës dhe Serbisë me ndërmjetësimin e BE-së është biseduar për përafrimin e qëndrimeve në mes palëve në çështjet që janë të lidhura me finalizimin e planit për veprim.
“Në këtë kuadër, Kosova do ta mearrë kodin telefonik ndërkombëtar 383 drejtpërdrejt nga ITU dhe se u konfirmua edhe njëherë se kërkesa në emër të Republikës së Kosovës do të bëhet nga ana e Austrisë. Poashtu plani për veprim parasheh që edhe çështja e bashkëpunimit në shërbimet postare në mes të të dyja shteteve të diskutohet dhe të përmbyllet deri në muajin dhjetor të këtij viti”, tha ajo.
Ministrja Tahiri vlerësoi se, caktimi dhe marrja e kodit telefonik për Kosovën ka rëndësi të madhe sepse Kosova do ketë një kod unik dhe të vetëm siç e ka çdo shtet, për dallim nga situata e tashme kur në përdorim janë disa kode.
“Ka pajtim që edhe operatorët e dy shteteve të bashkëpunojnë në fushën e interkoneksionit dhe roamingut me qëllim dhe synim të zbritjes së tarifave për qytetarët e dyja vendeve dhe marrëveshja parasheh që edhe Kosova të përfshihet në nismat rajonale për marrëveshjen e roamingut”, bëri të ditur ministrja kosovare.
Më tutje ministrja Tahiri, theksoi se pjesë e marrëveshjes është edhe lejimi i përkohshëm për një kompani të re të telefonisë në Kosovë, e cila do ketë fushëveprim të kufizuar.
“Ashtu siç edhe është sqaruar nuk bëhet fjalë për operator të ri të telefonisë meqë një lejim i tillë merret vetëm përmes procedurave të garës publike të tenderit me karakter ndërkombëtar. Me dakordimin final të këtij plani për zbatim që pritet të përmbyllet në takimin e radhës të kryeministrave do të shuhen operimet e operatorëve ilegalë që kanë vepruar në Kosovë në fushën e telekomunikacionit brenda një periudhe të paraparë me plan duke vendosur përfundimisht rregullësi në tërë territorin e Kosovës”, shprehet ministrja Tahiri.
Bëhet e ditur se, në fund të këtij takimi, palët u dakorduan që bisedimet të vazhdojnë dhe se të hënën e ardhshme, në 22 qershor , në Bruksel delegacionet do të takohen prapë.
Ndërsa, media serbe, duke iu referuar burimeve të qeverisë së Serbisë, raporton se “pas 15 orë bisedimesh për telekomunikimet në kuadër të dialogut teknik të Beogradit e Prishtinës nuk është arritur dakordim lidhur me çështjet kyçe” dhe se “bisedimet kanë përfunduar rreth orës një pas mesnate”.
/tesheshi.com/
