Ato janë familje 50 metra larg njëra-tjetrës, por Kanuni është vënë në veprim sikur të ishin dhe 500 apo 5 mijë metra larg. Sepse pak rëndësi ka distanca.
Familja e 69-vjeçarit Tom Lala në fshatin Gallatë të Kurbinit, është ngujuar që prej ditës së shtunë, kur kryefamiljari qëlloi për vdekje kushëririn e tij, Mark Ndreca.
Sipas rregullave të zakonit të gjakmarrjes, deri në mëngjesin e së martës ka qenë i ngujuar i gjithë fisi Lala; por me të shkuar lajmësi tek familja e autorit, fisi u njoftua për përfundimin e ngujimit dhe tashmë, vetëm familja e autorit qëndron e mbyllur brenda shtëpisë; kurse familjet e vëllezërve të tij do të jenë të lirë.
Policia, pra shteti, as që e merre mundimin të ndërhyjë në kodin e lashtë zakonor, ta ç’gjaksojë me forcën e ligjit situatën. Ajo thjesht bën “sikur”-in e zbatimit të ligjit duke qëndruar aty në vëzhgim të situatës, se mos ndoshta kris ndonjë pushkë. Më tej nuk shkon. Pra që të nxjerrë familjen nga ngujimi, e t’i përcjellë familjes së viktimës mesazhin që as të mos guxojë të shkrehë armën kundër ndonjërit prej familjarëve, të cilët nuk kanë asnjë lidhje me ngjarjen.
Pas hetimeve të grupit hetimor janë mësuar edhe detaje të reja në lidhje me ngjarjen e rëndë. Maria, gruaja e autorit të ngjarjes, ka dëshmuar, tre ditë para se të ndodhë ajo, se është rrahur nga viktima. Për këtë, në Komisariatin e Laçit ka dhe një kallëzim penal. Sapo ka marrë denoncimin, policia ka reaguar duke shoqëruar në polici viktimën për disa orë, deri në sqarimin e rrethanve të ngjarjes dhe më pas ai është lënë i lirë.
Ndryshe nga sa u shpall në versionin e parë të policisë, konflikti duke se nuk ka lidhje me rrugen që të çon drejt HEC-it të Vinjollit të ndërtuar nga Tom Lala, por për një urë që përdorej nga familja e tij. Pasi ajo u shemb, viktima ka kërkuar shinat e hekurit dhe kjo ka bërë që midis tyre të niste debati. Të shtunën, Ndreca dhe Lala janë takuar rastëisht në rrugë, ku viktima ka përdorur fjalor banal ndaj 69-vjeçari, i cili duket se nuk i ka përballuar dot fyerjet e kushëririt dhe ka qëlluar me një armë gjahu të cilën e kishte me leje duke e lënë të vdekur në vend.
Autori i ngjarjes, Tom Lala i cili për një kohë të gjatë ka jetuar në Shtetet e Bashkuara të Amerikës, ka dhënë një kontrbut të madh në zhvillimin e Malësisë së Kurbinit.
Gjatë vitit që lamë pas, ai me financat e veta rikonstruktoi rrugën dhe urën e fshtarave të kësaj zone. Që prej momentit të ngjarjes ai vijon të jetë në arrati, ndërsa kërkimet e policisë në zonë për kapjen e tij nuk kanë dhënë asnjë rezultat. A. Zani – /tesheshi.com/
