Nga Ahmet Zani
Ata duhet të jenë lumturuar paq kur i kanë blerë ato hyrje, që, meqe janë afër detit edhe duhet të jenë ndjerë “afër mbretit”, por sot, pas kaq vitesh, ata i ka kapluar një dëshpërim i madh.
Janë pra familje të një pallati tek Mali i Robit, një prej qindra ndërtimeve të asaj katrahure, tregues më i trishtë i kaosit shqiptar të këtyre 25 viteve.
Prej 12 vitesh, banorët e këtij pallati enden nëpër dyert e institucioneve me qëllim që të zbardhin të vërtetën e një mashtrimi që iu është bërë nga ana e pronarit, i cili pasi ju ka premtuar hipotekim dhe i ka marrë paratë, është zhdukur. Por jo vetëm kaq. Vetë pallati tashmë ndodhet pa asnjë rrugë, me ambient të ndotur nga të katër anët dhe me dëmtime nga amortizimi i tubacioneve të ujit.
Hasimja, një gruaja 51-vjeçare, banore e pallatit, thotë se problem është dhe rruga kur hyn e del nga shtëpia, pasi janë shfaqur pengesa të vëna nga disa persona që konsiderojnë pronën e tyre ambientin e jashtëm.
Po kështu, i zhgënjyer është dhe një banor nga Maqedonia, blerës i një apartamenti aty. Ai ka shpenzuar goxha të holla për një pronë tashmë të pahipotekuar, dhe për më tepër, në një vend më infrastrukturë të mjeruar.
Ata janë vetëm grimca të një realiteti gjigand zhgënjimesh që zgjatet me kilometra. Ndërtimet afër bregdetit në atë zonë, janë një ndër pamjet më të shëmtuara të hasura diku në Ballkan, dhe shumë prej atyre që kanë blerë apartamente në ato pallate i konsiderojnë paratë e shpenzuara për to si të humbura. /tesheshi.com/
