Një gjykatë federale amerikane në New York ka urdhëruar grupin politik libanez Hezbollah t’i paguajë 111 milionë dollarë dëmshpërblim një grupi amerikanësh që i paditën sepse u plagosën nga sulmet me raketa të grupit gjatë luftës së vitit 2006 me Izraelin.
Rasti është iniciuar në bazë të Aktit të SHBA-së kundër terrorizmit dhe prokurorët kanë deklaruar se Hezbollahu u ka shkaktuar lëndime fizike dhe emocionale, si dhe dëmtime në pronën e tyre, raporton AP.
Padi të tilla civile kundër grupeve politike janë të vështira për t’u zbatuar, por Nitsana Darshan-Leitner, një nga avokatët që përfaqësonte paditësit, tha se ishte një fitore e rëndësishme ligjore kundër grupit të mbështetur nga Irani.
Një zëdhënës i Hezbollahut nuk pranoi të komentonte vendimin.
Izraeli dhe Hezbollahu patën një luftë njëmujore në vitin 2006. Izraeli goditi objektivat në Liban, ndërsa Hezbollahu lëshoi mijëra raketa në qytete në Izraelin verior. Izraeli ende e konsideron grupin një kërcënim të madh. /tesheshi.com/
