“Ka dy vjet që shan, mallkon, akuzon dhe shantazhon sistemin e drejtësisë, por kur duhet të mbrojë aferat e tij shndërrohet si askush tjetër në avokat të saj”. Ky ka qenë komenti i kreut të partisë Demokratike, Lulzim Basha ndaj refuzimit të idesë për hetim ndërkombëtar të aferës së CEZ, nga ana e kryeministrit Rama. Ky i fundit në një intervistë për Zërin e Amerikës, theksoi se Shqipëria ka institucione të afta për të hetuar çdo afire.
“Pse i trembet Edi Rama hetimit ndërkombëtar për aferën 600 milionë euro? Pse ka frikë nga e vërteta?”, ka pyetur Basha, ndërsa ka komentuar për mediat deklaratat e Ramës.
Më tej Basha ka përsëritur akuzat e njëjta për qeverinë duke theksuar se Rama e trajton një popull të tërë si hajdut, por vetë do t’i ikë përgjegjësisë për 600 milionë euro të shpërdoruara.
Tashmë, politika është e ndarë në dy kampe edhe sa i takon hetimit ndërkombëtar të CEZ, por përpos ndarjes opozitë-qeveri e cila nuk habit më askënd për cilëndo aferë që të flitet, ka edhe një ndarje mes dy partive të koalicionit. Kreu i LSI-së, Ilir Meta është shprehur i vendosur për të mbështetur nismën e Berishës për hetim nga prokurorë të huaj të skandalit në CEZ, ndërsa kryeministri Rama u duk po aq i vendosur që të mos e lejojë një gjë të tillë. /tesheshi.com/
