Për herë të parë mazhoranca ka pranuar një hetim ndërkombëtar për aferën e CEZ, por ka shtuar frazën “gjithëpërfshirëse”. Këtë e deklaroi vetë kreu i grupit parlamentar socialist, Gramoz Ruçi, në fjalën e tij në Kuvend.
Ruçi deklaroi se PS-ja bie dakord për një hetim ndërkombëtar nëse përveç CEZ do të hetohet edhe Gërdeci e 21 Janari. Në fakt, opozita nuk e ka kundërshtuar direkt.
“Si mund të bëjmë ne një ligj për ndërkombëtaret? T’u bëjmë një kërkesë partnerëve tanë amerikanë, ne shqiptarët kemi disa probleme të cilat nuk jemi në gjendje t’i zgjidhim vetë. Ose s’kemi besim te njëri-tjetri, pa bërë fajtor asnjërin, dhe të radhisim katër çështje. CEZ që thoni ju, nga A te Zh, e dyta Gërdeci, e treta 21 Janari, e katërta aferë e rrugëve të kombit, po deshët të shtoni të pestë, unë do ti bind këta. T’u bëjmë kërkesë atyre që ata të thonë po, këto 5 çështje do ti marrim ne. Unë do t’i bind këta që do të ndryshojmë çdo nen të Kushtetutës të Kodit Penal, që të vijnë përfaqësi nga këta dy partnerë, SHBA dhe Bruskeli, t’i marrë këto 4 çështje, biles e 5,6 ,7 dhe t’i hetojë”, tha Ruçi në Kuvend.
Por çdo të thotë hetim ndërkombëtar dhe a ka pasur një precedentë në Shqipëri?
Ka pasur vetëm një rast në praktikën e shkuar kur ka pasur një hetim ndërkombëtar, kur për një çështje të madhe palët nuk kishin besim.
Bëhet fjalë për vrasjen e Azem Hajdarit. Lideri i opozitës në atë kohë, Sali Berisha, nuk pranonte të depononte në Prokurori faktet që dinte për vrasjen e Hajdarit. Me negociata OSBE cakton një grup ndërkombëtar që të asistojë grupin e prokurorëve shqiptarë.
Walter Wangberg, prokuror i Distriktit të Bergenit në Norvegji, atashohet pranë grupit hetimor shqiptar për zbardhjen e vrasjes së Azem Hajdarit. Ambasadori i OSBE-së në Tiranë, Daan Everts negocioi për emërimin e tij nga ana e këtij organizimi.
Më vonë largohet nga Shqipëria prokurori norvegjez Wangberg. Në vend të tij emërohet prokurorja e Oslos në Norvegji, Siri Frigaard dhe prokurori suedez, Christer Karphamar.
Sipas burimeve, Siri e kishte rrogën 30 mijë dollarë në muaj, të cilat financoheshin nga qeveria e Shteteve të Bashkuara të Amerikës.
Prokurorja norvegjeze ka pyetur të gjithë dëshmitarët e opozitës, me në krye Sali Berishën. Deponimi është bërë me shkrim dhe është dorëzuar në ambasadën e Shteteve të Bashkuara të Amerikës, që në atë kohë drejtohej nga i ndjeri Robert Froick, i cili kishte raporte të mira me kreun e PD-së.
Në fund, prokurorja norvegjeze përpiloi dosjen e plotë dhe ia dorëzoi prokurorisë shqiptare për procedim, e cila më pas kreu arrestimet dhe e çoi në gjykatë.
Por sërish sot edhe pas 15 vjetëve theksohet se ai hetim nuk është i plotë dhe nuk janë dënuar vrasësit e vërtetë…
Përgatiti: Ylli Pata- /tesheshi.com/
