Deputeti i qarkut të Elbasanit për PDIU, Aqif Rakipi, u përfshi në një aksident të rëndë, me pasojë vdekjen e një 53-vjeçari, mëngjesin e së shtunës.
Aksidenti ndodhi në aksin Vorë-Tiranë, në afërsi të mbikalimit të kthesës së Kamzës.
Prokuroria në konkluzionin e saj ka fajësuar viktimën, ndërsa deputeti do të hetohet në gjendje të lirë.
Pamjet e publikuara tregojnë se përplasja ka qenë e fortë, ku xhami ballor i makinës është i thyer, ndërsa pjesa e përparme e mjetit e dëmtuar rëndë.
Deputeti pas aksidentit është vetëdorëzuar në polici, duke zgjedhur komisariatin nr 2, ndërsa nuk ka një vlerësim zyrtar nëse kjo quhet largim nga vendi i ngjarjes apo jo.
Nga të dhënat e para hetimore si dhe nga deklarimet e dëshmitarëve okularë, rezulton se viktima sapo kishte zbritur nga një furgon bashkë me dy persona të tjerë.
Në tentativë për të shkuar në anën tjetër të rrugës, ai kaloi para furgonit që kishte ndaluar, kur u përplas nga Benzi që drejtohej nga Rakipi.
Nga ajo çka u publikua rezulton se deputeti nuk kishte konsumuar pije alkoolike, por nuk është thënë se me çfarë shpejtësie lëvizte mjeti në këtë aks rrugor.
Gjithsesi ndaj deputetit pritet të formulohen dy akuza, ajo e shkeljes së rregullave të qarkullimit dhe largim nga vendi i aksidentit. /tesheshi.com/
