Dyshimet mbi vdekjen e ish-anëtarit të lëvizjes Vetëvendosje, Astrit Deharit në ambjentet e paraburgimit në Prizren vazhdon të përplasë partitë në pushtet, PDK e LDK, me atë në opozitë, VV.
Tensionet mes deputetëve, erdhën pas përfundimit të mbledhjes së komisionit kuvendor për legjislacion. Ka qenë kryetarja e këtij komisioni, Albulena Haxhiu, e cila si përfaqësuese e Vetëvendosjes hodhi akuza të ashpra kundrejt dy partive në pushtet, si përgjegjësit e vetëm për vdekjen e 26-vjeçarit, Astrit Dehari.
Nga ana tjetër, deputeti i LDK-së, Armend Zemaj dhe ajo e PDK-së, Selvie Halimi i hodhën poshtë këto akuza. “Vetë e keni shtyrë me u vra njeriu, e tani kërkoni drejtësi”, u shpreh deputeti Zemaj, teksa dilte nga mbledhja.
I riu, Astrit Dehari ndërroi jetë më 5 nëntor në burgun e Prizrenit, si i dyshuar për sulmin me granata-hedhës, në ndërtesën e Kuvendit të Kosovës më 4 gusht.
Pas autopsisë, rezultoi se ai vdiq nga asfiksia, raport që familjarët e tij nuk e kanë njohur. Ndaj, ata kanë kërkuar një hetim të pavarur, me ndërmjetësimin e ndërkombëtarëve./tesheshi.com
