Hera e parë në 100 vjet: Larja në Senë, lejim nga 2025-a

Në Paris, banorët dhe turistët do të jenë përsëri në gjendje të notojnë në Senë nga viti 2025, për herë të parë në më shumë se 100 vjet, njoftoi të dielën kryebashkiakja Anne Hidalgo.

Ajo renditi tre vende që do të jenë të hapura për publikun, një qendër ujore që tashmë është pjesërisht në përdorim, si dhe dy pishina të tjera qendrore jo shumë larg Kullës Eiffel.

Zonat e notit do të jenë të shënuara me bova dhe të aksesueshme nëpërmjet skelës. Dhomat e zhveshjes dhe dushet do të sigurohen, tha qyteti.

Mundësia për t’u larë sërish në Senë ka qenë një dëshirë e kahershme e parisienëve.

Noti në Senë u ndalua zyrtarisht në vitin 1923 për shkak të cilësisë së dobët të ujit, por u praktikua ende deri në fillim të viteve 1960.

Projekti është një nxitje për Lojërat Olimpike që do të mbahen në Paris në vitin 2024. Disa nga garat e notit do të zhvillohen në Senë.

Përpjekje të shumta janë duke u zhvilluar për të përmirësuar cilësinë e ujit. Qyteti thotë se ka investuar tashmë deri në 1.4 miliardë euro për ta bërë Senën më të pastër për zonën e madhe të Parisit.

 “Kjo ka qenë një ëndërr e kahershme dhe është në rrugën e duhur për t’u bërë më në fund realitet,” tha qyteti. /tesheshi.com/