Andis Harasani, njeriu që dikur iu besua drejtimi i sistemit elektroenergjitik shqiptar, ka spekulluar mbi një deklaratë të Presidentit turk Erdogan në lidhje me shtetin e Kosovës, në kuadër të kundërshtimit prej këtij të fundit të referendumit kurd në veri të Irakut.
“Vëllai Erdogan ngrihet kundër të drejtës për vetëvendosje të kurdëve e thotë se as Kosova nuk është shtet”, shkruan Harasani në një prej dhjetra statuseve të tij përcjella çdo ditë në FB nga jeta amerikane, që në fakt i ngjan si një të rëndomte shqiptare, prej atyre që konsumohen në mënyrën më mizore duke qëndruar gjithë ditën e lume para Facebook-ut.
Për hir të së vërtetës Erdogan nuk ka thënë që Kosova nuk është shtet, por që me 100 e ca njohje, ende e ka të vështirë të jetë shtet e të njihet plotësisht si i tillë nga e gjithë bota. Dhe siç dihet, është realitet që Kosova ende nuk njihet nga disa shtete eminente me peshë në zhvillimet botërore. (Dhe kujtojmë se Turqia është shteti i parë që e ka njohur).
Këtë ka thënë pak a shumë Erdogan dhe mesazhi që ka dashur t’u përcjellë inisiatorëve të pavarësisë së Kurdistanit, është pamundësia shumë e shumë më e pakët se Kosova për t’u njohur si shtet.
Por ndërkohë, Harasani që ka një angazhim 24 orë në 24 për t’u gricur me ish-partinë e tij e qeverisjen e saj, nuk dihet nëse përdorimin e parashtesës “vëlla” për Erdoganin e ka patur me konotacion politik, pra duke e konsideruar si vëlla të Edi Ramës, apo dhe me konotacion social duke patur parasysh pëlqimin që lideri turk ka tek një pjesë e popullsisë shqiptare.
Megjithatë, kryesore dhe më e rëndësishme në dy gisht status që ka shkruar mbetet spekulacioni i ulët, dhe keqdashës pa dyshim, me një deklaratë të presidentit turk.
Dhe në fund duhet thënë dhe kjo për Harasanin: derisa nuk është në gjendje që sot t’u tregojë shqiptarëve se ç’i ka dhënë ai shtetit, njerëzve, me paratë e të cilëve është paguar, për aq kohë sa i është besuar një detyrë e lartë në një nga sektorët më problematikë siç është energjia; se cili ka qenë standarti i punës së tij, cilësia, performanca, rezultatet, është mirë të heshtë për gjëra që stili i tij shqiptar i të menduarit, nga më të rëndomtët, gjersa as jeta amerikane nuk ia reformon dot, e ka shumë të vështirë t’i përthithë. /tesheshi.com/
