Presidenti Thaçi “injoroi” këshillën e kryeministrit në detyrë Albin Kurti për të mosu takuar me krerët e partive kryesore, pasi sipas të rrëzuarit me mocion mosbesimi, duhet shkuar në zgjedhje të parakohshme, pa qenë nevoja e një tjetër qeverie.
Thaçi priti në takim pikërisht njeriun që më së shumti ndahet politikisht, kreun e AAK-së Ramush Haradinaj, duke u pozicionuar kështu që të dy kundër Albin Kurtit, bash në pikën e mosshkuarjes në zgjedhje të reja.
“Nuk e shohim të mundur shkuarjen në zgjedhje në këtë kohë. Qeveria e ardhshme mund të jetë me një afat kohor e përkohshme por shpalljen e zgjedhjeve tash e shohim të paarsyeshme”, ka thënë Haradinaj pas takimit me Thaçin.
“Është një kohë e ndjeshme në vend. Do të bëjmë kujdes në çdo veprim. Kushtetuta duhet respektuar në radhë të parë. Nëse ajo e mundëson zgjedhjen e një qeverie në parlament është më mirë që ta kemi një qeveri të zgjedhur. Deri atëherë qeveria në dorëheqje duhet t’i ushtrojë funksionet tjera, në përjashtim të bërjes së ligjeve”, tha Haradinaj. /tesheshi.com/
