Kryetari i Aleancës për Ardhmërinë e Kosovës, Ramush Haradinaj, nuk shprehet shumë optimist se në seancën e sotme gjykata në Kolmar të Francës mund të japë ndonjë vendim pozitiv për të, duke thënë se në bazë të praktikës së deritanishme të vonesave, mund të pritet që vendimi të shtyhet edhe për ditë apo javë.
“Është seancë ballafaquese. Prokurori do të paraqesë të gjeturat përfundimtare, pse janë përmbushur kriteret për ekstradim në Serbi, ndërsa ne, mbrojtja do të paraqesim argumentet që kjo kërkesë është e pa bazuar, e motivuar politikisht, s’ka bazë ligjore dhe duhet të hidhet poshtë”, ka deklaruar Haradinaj, në një bisedë për Radio “Evropa e Lirë”.
Ai ka përsëritur se pafajësia e tij është vërtetuar dy herë me proceset gjyqësore ndaj tij të zhvilluara në Tribunalin e Hagës. Haradinaj mendon se ndalesa e tij nuk ka të bëjë me asgjë tjetër, por siç thotë ai, “krejt kjo çështje është politike”.
“Baza e ndalimit tim është krejtësisht politike. Do të thotë aktakuza burimin e ka në vitin 2014, një aktakuzë që është nisur para proceseve gjyqësore që i kam kaluar në Tribunalin e Hagës. Në të vërtetë këto gjëra në Francë ndodhin, procesi është gjyqësor, por baza e këtij procesi është krejtësisht politik”, ka pohuar Haradinaj.
Sidoqoftë, ai thotë se respekton dhe beson në drejtësinë ndërkombëtare.
“Pra, respektoj ligjin ndërkombëtar, por nuk e njoh juridiksionin e Serbisë mbi mua. Këtë juridiksion të tashëm dhe të atëhershëm. Ne i kemi nda rrugët me të. Shikojeni absurdin, presidenti i qeverisë, i zgjedhuri ishte ministër i qeverisë së Millosheviqit në kohën kur ka ndodhur gjenocidi në Kosovë”, ka thënë Haradinaj.
Kreu i AAK-së është ndaluar nga policia franceze më 4 janar, në bazë të një urdhër-arresti ndërkombëtar të lëshuar nga Serbia përmes Interpolit. Ai akuzohet nga drejtësia e Serbisë për krime lufte.
Pas seancave gjyqësore më 9 shkurt dhe 2 mars, tani vendimi i ri për Haradinajn do të mësohet sot në seancën që pritet të mbahet në ora 14:00. /tesheshi.com/
