Hapet panairi i prodhimeve artizanale për “Ditët e Diasporës”

Në sheshin Zahir Pajazit sot është hapur panairi me veshje kombëtare dhe prodhime tjera vendore. Tashme tradicionalisht ky panair mbledh rreth 60 shoqata, organizata joqeveritare, nga gjitha trojet shqiptare.
Pjesëmarrësit në këtë takim kanë falënderuar Ministrinë së Diasporës që është bashkë organizatore e këtij panairi,  për mundësinë e dhënë që para bashkatdhetarëve të promovojnë prodhimet artizanale, ushqime, veshmbathje, bizhuteri të ndryshme e të cilat janë të gjitha punime dore.
Po ashtu në hapje të këtij panairi prodhuesit vendor i vizitoi edhe Ministri i Diasporës, z. Valon Murati, i cili deklaroi se “ky aktivitet tradicional, që e zhvillojmë në kuadër të  muajit “Ditët e Diasporës”, do të jetë tri ditë. Qëllimi kryesor i këtij panairi është të mbledhë në një vend  shoqatat e gratë me punimet e tyre, veshjet e ushqimin tradicional, të cilat bashkatdhetarëve tanë u mungojnë gjatë gjithë vitit”
Më tej ministri Murati  theksoi se edhe ky aktivitet është pjesë e fushatës “Ti je pjesë e atdheut” , që lidhet ngushtë me fushatën për hartimin e regjistrit të diasporës.
Në këtë panair, ku po i ekspozojnë veshjet dhe prodhimet e tyre, po marrin pjesë shoqata, individë dhe OJQ të ndryshme nga Kosova, Shqipëria dhe nga Turqia. Panairi do të qëndrojë i hapur deri më 8 korrik 2015.