Hames Rodriguez mund të jetë blerja e madhe, që i ka munguar Bajernit të Mynihut këtë sezon. Kolumbiani ka shënuar golin e parë të tij në Bundesligë, në fushën e vështirë të Shalke 04, duke qenë protagonist edhe në 2 golat e tjerë që bavarezët shënuan.
Duke patur lirshmëri në vendosjen në fushë, 24- vjeçari ka bërë çfarë “ka dashur” ndaj Shalkes, duke detyruar mbrojtësin të prekte topin me dorë, në penalltinë e shndërruar në gol nga Levandovski, duke shënuar vetë me një të majtë teknike, golin e dytë, e duke gjetur mes mbrojtësish Vidalin, në golin e tretë.
Mediat në Gjermani janë ekzaltuar nga paraqitja e parë “e vërtetë” e Hames, duke nxituar ta konsiderojnë superblerje, atë për të cilin, deri tani, kishin shkruar se ishte një lojtar mesatar. E nëse mediat të ulin e të ngrenë brenda një kohe fare të shkurtër, është vetë lojtari që duhet të bindë Ançelotin, se është vlerë e shtuar në skuadër, pikërisht në një kohë kur konkurenca është shumë e lartë, e kur “të vjetrit e pamplakshëm”, Roben e Riberi, kanë gjithnjë dëshirë të jenë në fushë.
Por nëse në skuadrat e tjera të mëdha europiane, janë pikërisht lojtarët e mëdhenj, që praktikisht janë edhe më të shtrenjtët, që bëjnë diferencën, tek Bajerni i Mynihut, mund të jetë konkurenca, shtysa që nga kontigjenti aktual i skuadrës, të shkëlqejnë të gjithë. Hames zhvilloi vetëm ndeshjen e parë “të vërtetë”, por nëse vijon me këto ritme, mund të kthehet në çelësin taktik të skemave të Ancelotit. /tesheshi.com/
