Duke iu referuar situatës në Ballkan, ku së paku dy vende, Maqedonia dhe Shqipëria janë përfshirë në kriza të pashembullta politike, komisioneri për Zgjerim, Johanes Hahn, ua ka drejtuar dhe njëherë apel krerëve vendas që të jenë më të përgjegjshëm: “Është e domosdoshme të zbatohen reforma reale në terren, në veçanti në fushën e sundimit të ligjit dhe konkurrencës gjë që mund të cënojë modelet e punës së individëve, por alternative nuk ka dhe këtë e dijnë qytetarët”, tha diplomati i lartë europian gjatë një fjalimi në Universitetin e Prinstonit.
Komentet e tij ishin në vazhdën e promovimit të idesë se për Ballkanin duhet pasur një impenjim të madh, pasi siç tha Hahn ky rajon është një enklavë e Europës.
“Imagjinoni dot se ku do të ishin sot Polonia ose shtetet baltike sikur mos të kishte pasur zgjerim në vitet ’90-të? Ballkani Perëndimor është në oborrin tonë dhe në këtë rajon politika e eksportit të stabilitetit është në veçanti relevante sepse atje nuk kemi mbaruar ende pune”, theksoi zyrtari i lartë i BE-së.
Gjithashtu Hahn shprehu shqetësimin e njohur se nëse Ballkani lihet mënjanë, dikush tjetër – dhe këtu e kishte fjalën për Rusinë – mund të zgjeronte influencën në rajon. /tesheshi.com/
