“Kam vendosur ta hedh votën time për Hillary Clinton-in, sepse besoj që kjo është e vetmja udhë përpara për ta fituar presidencën dhe për ta ndaluar kandidaturën e rrezikshme të Donald Trump-it.”
Kjo është ajo çka u shkroi guvernatori i Kalifornisë, Jerry Brown, në një letër të hapur demokratëve të Kalifornisë dhe votuesve të pavarur përpara zgjedhjeve paraprake të 7 qershorit.
Jerry Brown ka shprehur përkrahjen e tij për ish-sekretaren amerikane të Shtetit, duke deklaruar se vota për Clinton-in është e vetmja mënyrë për ta ndaluar “kandidaturën e rrezikshme” të Donald Trump-it.
Në Kaliforni mbahen më 7 qershor zgjedhjet paraprake në kampin demokrat, që janë të fundit dhe më të mëdhatë. Edhe pse dy muaj më parë Clinton udhëhiqte bindshëm, një fitore e Bernie Sanders-it në Kaliforni mund ta mbartte luftën për kandidaturën në Konventën e demokratëve në korrik.
Guvernatori i Kalifornisë, një demokrat, ka thënë fjalët më të mira për senatorin e Vermontit, por duke e përkrahur hapur Clinton-in.
“Demokratët kanë treguar, me milionat e votave, se e duan atë si kanidadate të tyre,” ka shkruar ai.
Kalifornia ka votuar për demokratët në gjashtë zgjedhjet e shkuara presidenciale në SHBA, që prej fitores së Bill Clinton-it në vitin 1992. /tesheshi.com/
