Tekniku i Mançester Sitit ka folur pas humbjes së thellë ndaj Barcelonës në Champions League, duke mos e parë situatën tërësisht gri për skuadrën e tij.
Ai e ka pranuar se e ka sjellë në mendje ndryshimin e qasjes së tij ndaj futbollit, e stilit të tij të luajturit, por në fund ka vendosur të vijojë në rrugën e nisur.
“Po, kam menduar, por pas kësaj zgjidhja nuk është më e mirë nga ç’besoj. Prandaj nuk mund të ndryshoj,” i është përgjigjur ai interesimit të gazetarëve.
“E dini pse? Sepse në shtatë vite kam fituar 21 tituj. Do të thotë, tre tituj në vit duke luajtur në atë mënyrë.”
“Por nëse besoni se unë arrij këtu dhe në tre muaj gjithçka shkon mirë, se do të fitoj në ‘Camp Nou’ 0-4, se do të dominoj ndaj Messi-t, se Luis Suarez dhe Neymar nuk do të krijojnë asgjë, e se Iniesta nuk do të luajë mirë, jo! Jam i mirë, por kjo nuk mjafton,” ka vijuar ai t’u thotë të pranishmëve.
“Nuk do të ndryshoj. Nëse nuk shkon mirë në të ardhmen, nëse sezoni i ardhshëm nuk shkon mirë kësisoj, do të shkoj në shtëpi.”
Në përgjigje të kritikave, Guardiola ka përmendur një kompliment të bërë së fundi për ekipin e tij, “Një nga miqtë e mi, Ronald Koeman, tha në një konferencë shtypi se kurrë nuk kishte luajtur me një ekip që të luante si Mançester Siti.”
“Ky është titulli më i mirë për mua, ky është komplimenti më i mirë që kam marrë. Një kundërshtar që e do futbollin, që e kupton atë, thotë, ‘Ua, ata luajnë mirë dhe ishin të pafat.’” /tesheshi.com/
