Mjeku psikiatër Sadik Lala, lëshuar i një kartele për shtetasin Gerti Shehu, 31-vjeçarin që goditi me grusht Berishën, ka rrëzuar këtë të fundit, ish-pedagog i tij, i cili e paragjykoi kartelën, duke thënë se ka dalë nga Kryeministria, për të justifikuar dhunën ndaj tij.
“Paraprakisht desha të uroj së pari shëndet dhe të shkuara profesorit tim Berishës.
Gerti ka qenë pacient edhe përpara se të vinte në klinikë. Dokumenti është autentik, me numër regjistri sepse ne mbajmë rekorde. Ju duhet ta dini që shërbimi psikiatrik dhe kirurgjia janë dy profesionet në mjekësi që i mbajnë më gjatë dokumentet mjekësore të ruajtura në regjistrat e të dhënave. Është pikërisht për shkak të problemeve ligjore që mund të ndodhin me pacientë të veçantë. Kjo është lehtësisht e verifikueshme. Dokumentin ma ka kërkuar dhe policia kriminale”, tha mjeku Lala në Euronews Albania.
Madje ai shtoi se ka rekomanduar shtrimin ne psikiatri të 31-vjeçarit pak vite më parë.
“Gert Shehu nga unë është trajtuar në periudhën 2018, më duket se në janar, shkurt, sepse nuk e kam dokumentin që të jem i saktë, nuk jam në zyrë. Nuk ka qenë i rregullt me marrjen e ilaçeve, madje në gusht e kam rekomanduar për në urgjencën e psikiatrisë, sepse ju duhet ta dini ligji i shëndetit mendor supozohet që pacientët që kanë të dhëna për dhunë ose mosbindje, mos marrje mjekimi, i adresojmë për në urgjencën psikiatrike dhe pastaj kolegët e urgjencës vendosin për ta mbajtur, për ta trajtuar derisa gjendja të rikuperohet”, sqaroi mjeku Sadik Lala.
I pyetur se pse e goditi Berishën, ai dha këtë përgjigje: “Një pacient nën efektin e psikozës, paranojës që mund të ketë në momente të caktuara apo efektin e përdorimit të substancave, apo gjëra të tjera të lidhura mund të shfaqin sjellje të ndryshme. Është shumë e vështirë ta thuash me një fjali”. /tesheshi.com/
