Presidenti serb Vuçiç reagoi pas raportimeve se në veri të Kosovës, në ditën e Samitit BE-Ballkani Perëndimor, ka pasur shpërthime dhe të shtëna me armë. Sipas tij, Kosova, në kundërshtim me marrëveshjet e arritura në Bruksel, ka dërguar polici të armatosur rëndë në veri.
“Gjithmonë vras mendjen se kur do të vijë provokimi i radhës, që do të prishë stabilitetin dhe paqen. Sipas të dhënave, nuk kemi informacione për viktima dhe besoj se është e mundshme që kjo të ketë ndodhur. Nuk e di çfarë po u shkon njerëzve në mendje, që shkaktojnë tensione dhe destabilizim çdo javë. Kemi përpara një periudhë të vështirë, por është e rëndësishme që të qëndrojmë pranë njerëzve tanë dhe të negociojmë për paqe me shqiptarët”, tha Vuçiç.
Por çfarë ndodhi realisht në Veri, duke bërë që të uturijnë sirenat e alarmit?
Siç u raportua nga Policia e Kosovës, kanë ndodhur disa shpërthime.
“Në orët e hershme të pasdites në disa zona të Zubin Potokut dhe Mitrovicës Veriore janë shënuar disa incidente (të shtëna të dyshuara dhe shpërthime), por deri më tani nuk raportohet për të lënduar në ato incidente, ndërsa raportohet se protestuesit kanë rrënuar zyrat e komisioni zgjedhor komunal. Policia e Kosovës në vazhdimësi monitoron dhe vlerëson situatën e sigurisë në vend dhe ndërmerr masat e nevojshme për zbatimin e ligjit dhe vendimeve të autoriteteve”, ka thënë Policia.
Policia tha se njësitet policore i kanë shoqëruar zyrtarët komunalë zgjedhor në zyrat e komisioneve zgjedhore në Zubin Potok dhe Mitrovicën e Veriut.
Më saktë, me disa qindra serbë u mblodhën në qendër të Zubin Potokut, duke protestuar kundër hyrjes me forcë të anëtarëve të komisionit zgjedhor komunal, të shoqëruar nga policia, në ndërtesën e komunës.
Kujtojmë se Veriu përgatitet për zgjedhje të pjesshme lokale, me qëllimin për të zëvëndësuar katër kryekomunarët serbë të dorëhequr. /tesheshi.com/
