Ish-kryeministri maqedonas Nikola Gruevski tha në intervistën e tij të parë pas arratisjes së Hungari, se ikja nga Maqedonia ka qenë ” shumë e lehtë”, dhe se ajo nuk ka pasur ndihmën e autoriteteve.
“Qeveria të më ketë ndihmuar mua? Po. Ajo ka patur fuqi për t’i shpallë të këqia ato që kemi bërë, por jo të më ndihmojë”, tha Gruevski në një intervistë me TV Sitel.
Në pjesën e transmetuar në lajme, ai theksoi se nga Maqedonia është shumë e lehtë për të kaluar në Shqipëri, ku më pas shkoi në ambasadën hungareze në Tiranë, e prej aty vijoi udhëtimin drejt Budapestit, duke kaluar nga Mali i Zi e Serbia.
Gruevski nuk pranoi të thoshte nëse doli nga Maqedonia ilegalisht apo të në mënyrë të rregullt, duke theksuar se autoritetet maqedonase mund t’i zbulojnë vetë detajet.
“Qeveria mburret se do të zbulojë gjithçka, kështu që le t’i thotë”, tha ish-kryeministri maqedonas.
Gruevski tha se qeveria e Hungarisë ka vendosur për t’i dhënë atij azil për shkak të statusit të tij si ish-kryeministër, dhe se për këtë arsye do ta mbrojë atë.
Ish-kryeministri maqedonas u dënua në Maqedoni për dy vjet burg për shpërdorim detyre, por në mes të nëntorit, në vend që të burgosej, ai u largua nga vendi në terrin e natës, duke pëfunduar në Tiranë e më pas në Budapest, ku dhe kërkoi azil në vendin e udhëhequr nga Viktor Orban, ish-aleat politik dhe mik i tij. /tesheshi.com/
