Në katër ndeshjet e javës së shkuar në Champions League u shënuan 15 gola, ndërkohë që në dy takimet e kësaj mbrëmjeje pati vetëm një më pak. Mançester Siti dhe Atletiko e Madridit i mposhtën kundërshtarët në sfida ku rrjetat nuk reshtën së tunduri sa në njërin krah në tjetrin.
Anglezët e Mançester Sitit e përmbysën dy herë rezultatin ndaj Monakos, skuadrës që ka shënuar më shumë se çdo tjetër në pesë ligat më të mira europiane.
Falcao shënoi dy herë për miqtë, por humbi dhe një 11-metërsh. Te vendasit, Aguero ishte në superformë; shënoi dy gola dhe u dha një përgjigje zërave që e shihnin atë larg Mançesterit.
Rezultati 5-3 ia bën më të afërt kualifikimin skuadrës së Guardiola-s, por asgjë nuk përjashtohet në ndeshjen e kthimit.
Në momentin më të mirë sezonal, Atletiko e Madridit fitoi sonte 2-4 në transfertën gjermane ndaj Bajer Leverkusenit. Përfundim që e bën Atletikon thuajse të kualifikuar, veç në ndodhtë ndonjë përmbysje e pamenduar kur Leverkuseni të pritet në “Vicente Calderon”.
Saul, Griezmann, Gameiro dhe Fernando Torres qenë shënuesit për Atletikon, ndërsa nuk mungoi dhe një autogol nga Savic. /tesheshi.com/
