Qeveria e Kosovës rifut në procedurën e Kuvendit ndryshimet kushtetuese drejt krijimit të Gjykatës Speciale.
Amendamentet do të formulohen ndryshe nga ç’ishin dhe do të zhvillohen negociata paraprake me grupet e tjera parlamentare.
Pas rrëzimit të amendamentit një ditë më parë, qeveria pas një mbledhje të gjatë, të cilën kryeministri Isa Mustafa e cilësoi consultative, vendosi të dërgojë propozim ligjin sërish në Kuvend.
Mbledhja e qeverisë u zhvillua për të biseduar për hapat që do ndërmerren rreth përmbushjes së obligimeve të institucioneve kosovare, me këtë rast për themelimin e Gjykatës Speciale.
“Dje ka qenë seanca e Kuvendit të Republikës së Kosovës, në të cilën është diskutuar gjatë lidhur me amendamentet kushtetuese. Përkundër asaj që nuk është arritur që të sigurohen votat e dy të tretave të Kuvendit në mënyrë evidente është realizuar vullneti i shumicës së deputetevë, dhe kjo flet lidhur me përcaktimin e shumicës që ne të ndjekim rrugën evropiane dhe euroatlantike, që të tregojmë seriozitetin tonë lidhur me zbatimine të gjitha detyrimeve tona që i kemi marrë ndaj faktorit ndërkombëtar, edhe në vitin e kaluar lidhur me Ligjin për ratifikimin e marrveshjes, përkatësisht letërkëmbimit ndërmjet Presidentes së Republikës së Kosovës, Atifete Jahjaga dhe Baroneshës Catherine Ashton e që ka të bëjë me themelimin e Dhomave të Veçanta të Gjykatës Speciale”, tha kryeministri Mustafa.
Me këtë rast, viojoi ai, konsiderojmë se duhet të bëjmë të gjitha përpjekjet si qeveri e Republikës së Kosovës që edhe më tutje të përmbushen detyrimet e vendit tonë, sepse kemi të bëjmë me përmbushjen e detyrimeve ndaj vënies së drejtësisë, gjithmonë duke bashkëpunuar me SHBA-të dhe me BE-në, në mënyrë që të shtrojmë një rrugë për një perspektivë të përbashkët të zhvillimit të Kosovës.
“Ne mendojmë se është mirë që në ditët në vijim qeveria e Republikës së Kosovës të bashkërendis aktivitetet me Kuvendin e Republikës së Kosovës, me grupet parlamentare, në mënyrë që të punojmë të gjithë së bashku që në ditët në vijim të riprocedohet lënda e ndryshimeve kushtetuese, përkatësisht amendamenteve kushtetuse në Kuvend dhe po ashtu të zhvillojmë takime dhe biseda edhe me faktorin ndërkombëtar, i cili është këtu në Kosovë dhe të bashkërendisim të gjitha këto punë”, tha Mustafa.
Qeveria e Republikës së Kosovës në një deklaratë vlerësoi se mosmiratimi i djeshëm në Kuvendin e Kosovës i ndryshimeve kushtetuese që do të hapnin rrugë për miratimin e Ligjit për Dhomat e Specializuara dhe Zyrën e Prokurorit të Specializuar, si dhe Ligjit për Mbrojtjen Juridike dhe Mbështetjen Financiare të Personave të Akuzuar potencialë në Proceset Gjyqësore pranë Dhomave të Specializuara, nuk i shërben interesave madhore të Kosovës.
“Qeveria e Republikës së Kosovës, mbetet e përkushtuar të punojë deri në përmbushjen e plotë të detyrimeve që derivojnë nga letërkëmbimi ndërmjet Presidentes së Republikës së Kosovës, Atifete Jahjaga dhe Baroneshës Catherine Ashton si dhe fton të gjitha institucionet që t’i kontribuojnë përmbushjes së këtij obligimi dhe të mbrojnë interesat e shtetit të Kosovës”, theksonte deklarata.
“Qeveria e Republikës së Kosovës vlerëson se çdo dështim për përmbushjen e obligimeve nga ana e institucioneve tona, e vë në pikëpyetje seriozitetin dhe perspektivën euroatlantike të Republikës së Kosovës”, përfundon deklarata./tesheshi.com/
