Kryeministri izraelit dhe gjashtë zyrtarë të tjerë të lartë të kabinetit të tij janë gjetur fajtorë nga një gjykatë spanjolle për krime kundër njerëzimit, për rolin e tyre në sulmin mbi anijen Mavi Marmara në 2010-ën.
Gjykata e Lartë spanjolle ka urdhëruar mes të tjerëve arrestimin e Netanyahu-t, të ish-ministrit të Jashtëm, Avigdor Lieberman, e të ish-ministrit të Mbrojtjes, Ehud Barak.
Aktivistët spanjollë të pranishëm në bordin e anijes Mavi Marmara patën ngritur një padi kundër zyrtarëve izraelitë të përfshirë në sulm, çka solli dhe nisjen e një hetimi. Një gjykatë spanjolle do ta hidhte poshtë në qershor hetimin pesëvjeçar, por në vendim do të linte të hapur mundësinë që çështja të rihapej nëse Netanyahu vinte në Spanjë.
Çështja u çua më pas në Gjykatën e Lartë, e cila ia dërgoi listën e të paditurve policisë, duke kërkuar nisjen e procedurave për arrestimin e tyre. E gjitha kjo mund të ngjasë nëse ata vënë këmbën në tokën spanjolle.
Mavi Marmara-ja u përpoq të çante bllokadën e vënë ndaj Gazës, e ngarkuar me ndihma për palestinezët. Izraelitët mësynë forcërisht asokohe në anije, duke vrarë nëntë aktivistë e duke plagosur dhjetëra të tjerë. /tesheshi.com/
