Kafeteritë dhe zonat e ngrënies së drekës e të darkës në zyrat moderne mund të konkurrojnë pa frikë me restorantet më të mira në botë. Nuk e kemi fjalën për asnjë zyrë pune apo fabrikë në territorin shqiptar, por për ato jashtë shtetit. Në ndryshim nga restorantet, këto vende ngrënieje në zyra kanë një diferencë të vetme: janë falas, vetëm për stafin. Kompanitë e suksesshme me sa duket, dinë të punojnë mirë dhe të kënaqin jo vetëm përmes rrogës, por edhe nëpërmjet ngopjes e mirëqenies së stomakut të punonjësve të tyre.
Selia e Google është në New York. Punonjësit e kompanisë mund të shijojnë falas vaktet që shërbehen çdo ditë në Hemispheres, me pamje të bukur nga Manhatani. Kafeneja ka disa zona, ku mund të gjeni një varietet kuzhinash, ushqimesh të shpejta, pije të ndryshme etj.
Apple
Zyrat e Apple ndodhen në Cupertino të Kalifornisë. Zona e tyre e ngrënies, e cila quhet Caffè Macs ka goxha hapësirë, dritë dhe është tërësisht falas. Caffè Macs shërben ushqim meksikan, italian, japonez, spanjoll dhe francez për drekë, si dhe ushqime të shpejta. Për mëngjes, zakonisht stafi konsumon tost francez me luleshtrydhe, kekë me çokollatë, lëng të freskët, çokollata të shumëllojshme dhe ëmbëlsira të tjera. Menyja ndryshon në mënyrë të vazhdueshme.
Kohët e fundit, zyrat qendrore të Facebook janë zhvendosur në një qytet të vogël të njohur me emrin Menlo Park në Kaliforni. Stafi mund të marrë ushqim falas tre herë në ditë në Epic Cafe. Përgjithësisht shërbehen ushqime të kuzhinës amerikane dhe aziatike. Nëse jeni punonjës i kompanisë, ju mund të merrni ushqime të ndryshme me vete në shtëpi. Edhe për ata që janë të ftuar apo vizitorë ka bonuse të kënaqshme: ushqehen me çmime të ulëta.
Selia e një prej rrjeteve sociale më popullore në botë, gjatë kohëve të fundit është zhvendosur në një ambient të ri. Tani ndodhet në një ndërtesë të ndërtuar në vitin 1937 në Market Square në zemër të San Franciscos. Ushqimi është tërësisht falas për të gjithë stafin dhe menyja është e ndarë në lloje të ndryshme pjatash, të cilat janë emëruar me hashtage dhe emra si #comfort food, #tenderloin, dhe @birdfeeder./tesheshi.com/
