Kriza energjitike e shkaktuar nga thatësira e verës po shkon drejt stabilizimit. Kështu deklaroi ministri i Infrastrukturës dhe Energjisë, Damian Gjiknuri, ndërsa inspektoi ndërrimin e rrjetit të vjetër me atë të ri.
“Klima po përmirësohet dhe besoj se pjesa më e madhe e rrezikut është tejkaluar. Në kushtet që jemi, edhe me mbështetjen në bazë të aktit normativ, situata do jetë e stabilizuar dhe nuk do kemi problem me importin e furnizimin”, deklaroi Gjiknuri.
Po ashtu, ministri është shprehur se në çdo situatë të vështirë që mund të paraqitet, qeveria do të bëjë të mundur sigurimin e energjisë për qytetarët.
Ndërsa, drejtori i OSHEE-së Ardian Çela, bëri të ditur se investimet në rrjetin e energjisë do të vazhdojnë, duke shtuar se po shkohet drejt standardeve evropiane.
“Janë 20 kilometra kabëll i ri dhe rreth 28 kabina të reja. Ky investim pasohet edhe nga një tjetër për fidrin 356 që do të kapë gjithë pjesën e mbetur të Don Boskos dhe Bregun e Lumit. Brenda këtij viti, kjo zonë do të ketë një linjë të re shpërndarjeje brenda standardeve. Ky nuk është investimi i fundit që po kryejmë në Tiranë me fondet e OSHEE”, deklaroi drejtori i Operatorit, Ardian Çela. /tesheshi.com/
