Petra Pazsitka ishte 24 vjeçe kur, pa lënë gjurmë, u zhduk nga Braunschweig, një qytezë në veri të Gjermanisë, ku jetonte në një shtëpi bashkë me disa studentë dhe po përgatitej për disa teste në mënyrë që të merrte diplomën në informatikë.
U pa për herë të fundit në publik më 26 korrik 1984. Të gjithë mendonin se ajo kishte ndërruar jetë prej kohësh, pasi një burrë kishte rrëfyer për vrasjen e saj. Por në fakt, sot, 31 vite më pas, ajo u shfaq në mënyrë të papritur.
Ngjarja: Petra u pa për herë të fundit në publik më 26 korrik 1984, ndërsa ishte duke shkuar tek dentist. Doli nga studioja mjekësore rreth orës 3 të pasdites dhe sipas asaj që ka dëshmuar në atë kohë një miku i saj, Petra duhej të kishte hipur në autobus për të takuar prindërit në Wolfsburg. Ajo nuk mbërriti kurrë në destinacion. Autoritetet hapën një hetim për vrasjen e Petrës. Dyshimet ranë menjëherë mbi të njëjtin person që një vit më parë kishte vrarë një vajzë 14 vjeçare. Në fund të marsit të vitit 1985, policia arrestou Gunter K., një murator 19 vjeçar. Në vitin 1987 ai rrëfeu se kishte vrarë vajzën e zhdukur, pra Petrën, e cila në vitin 1989 u shpall zyrtarisht e vdekur.
Kthimi: Gruaja, pasi pësoi një vjedhje në banesën e saj në Dusseldorf u rrëfeu agjentëve identitetin e saj të vërtetë. Petra sot është 55 vjeç dhe ka treguar se ka kaluar në Dusseldorf 11 vitet e fundit të jetës së saj. Për 31 vite me radhë kishte mundur të jetonte pa pasur një numër të kodit fiscal, një dëshmi që vërteton ekzistencën e saj, një patent makonë, një pasaportë, apo një llogari bankare. Arsyeja e zhdukjes? Nuk donte të kishte më kontakte me prindërit e saj apo me personat që njihte, në përgjithësi./tesheshi.com/
