Kur gazetarët dhe karikaturistët britanikë e cilësonin Tony Blair si “Bush poodle” (qimedredhuri i Bush), nuk e kishin aspak gabim. Ish kryeministri laburist ishte aq i gatshëm t’i bindej ish presidentit amerikan, saqë ishte deklaruar i gatshëm të dërgonte trupa për Amerikën në Irak, për të mposhtur Saddam Hussein, një vit para se të niste konflikti.
Ky lajm është bërë publik në mediat amerikane, ku publikohen edhe e-maile sekrete të cilat datojnë më 28 mars të vitit 2002 (bomba e parë u lëshua në Bagdat më 19 mars 2003), të dërguar nga Departamenti i Shtetit në Shtëpinë e Bardhë, nga të cilat rrjedh se Blair ishte ofruar për të bërë ‘spin doctorin’ e Bush, në mënyrë që të bindte opinionin publik botëror se lideri irakian zotëronte me të vërtetë të ashtuquajturat “armët e shkatërrimit në masë’, të cilat nuk janë gjetur kurrë në këto 8 vite luftime. Gjithçka ka ndodhur gjatë kohës që Blair përsëriste në publik se po kërkohej një mënyrë që kriza të zgjidhej në mënyrë diplomatike.
Dokumenti i parë i publukuar në media është një e-mail i klasifikuar “Secret/Noforn” (sekret/të mos u tregohet të huajve) i dërguar në atë kohë nga sekretari i Shtetit, gjenerali Colin Powell, në formën “memorandum for the president” për të përgatitur takimin i cili u zhvillua nga 5 deri në 7 prill në fermën Crawford në Teksas, ku dy liderët ranë dakort për gjithçka.
Në dokument, Powell shkruan “Blair do të jetë me ne për ndërhyrjen e armatosur për pushtimin Irakut” ndërsa siguron se “Mbretëria e Bashkuar do të ndjekë rrugën tonë”. Me fjalë të tjera, Londra është e gatshme të bëjë gjithçka që Amerika do t’i kërkojë. Në një email të dytë rrëfehet se si Bush u drejtohet spiunëve në Partinë e Punës së Blair, për të ndihmuar kryeministrin të manipulojë opinionin publik në favor të luftës.
Blair ka mohuar përherë që t’i ketë dhënë aprovimin e Londrës Presidentit Bush, në lidhje me këtë çështje. Mirëpo, vetëm pesë muaj pas atij takimi, Downing Street prodhoi dossierin famëkeq në lidhje me ‘faktin’ se Saddam Hussein ishte në gjendje të ‘lëshonte një raketë mbi Londrën për 45 minuta, një armë shkatërrimi në masë’.
Këto të dhëna të reja bënë që Blair të dalë si një gënjeshtar: përpara komisionit Chilcot, i cili prej vitesh është duke hetuar në lidhje me ‘shkaqet’ e luftës, në janar të vitit 2010, ish-kryeministri laburist mohoi se kishte nënshkruar një marrëveshje me Bush në Crawford për të sulmuar Irakun.
Dokumentet e bëra publike në media janë pjesë e një bombe tabloidësh të tjerë, të cilat janë cilësuar si ‘email sekrete’ dhe që janë ruajtur në mënyrë private në serverat e postës elektronike të përdorura nga pasuesi i Powell (Condoleeza Rice në mandatin e dytë të Bush) dhe aktualisht nga kandidatja për kreun e Shtëpisë së Bardhë, Hullary Clinton, e cila për 4 vite ka qenë në krye të diplomacisë së SHBA-ve, nga viti 2009-2013. /tesheshi.com/
