Qeveria kosovare pritet të vendosë rikthimin e pronave të sekuestruara të gazetës historike “Rilindja”, duke bërë kështu të mundur ridaljen e gazetës së parë në gjuhën shqipe në Kosovë. Pjesë e vendimeve të qeverisë në 23 majin e 2014-ës ishte edhe vendimi përfundimtar i shpronësimit për interes publik të ngastrave kadastrale në të cilën ndodhen objektet e Ndërmarrjes Shoqërore Rilindja, e, në këtë kuadër, të Pallatit Rilindja, tash ndërtesë qeveritare.
“Sa i përket shpronësimit të Pallatit të Rilindjes, është çështje e dakordimit të veprimit me Agjencinë 
Kosovare të Privatizimit, sepse në atë rast ne paguajmë vetëm 20 përqindëshin që u takon punëtorëve,” deklaroi ministri i Financave, Avdullah Hoti, duke shtuar se nuk kishte detaje të tjera.
Pas shpronësimit, dhe në kuadër të procesit të ligjshëm të privatizimit, pritet e kërkohet edhe ridalja e gazetës së përditshme tradicionale të Kosovës, Rilindja, e cila e nisi udhën e saj në Prizren para 70 vitesh, më 12 shkurt 1945, me shkronja plumbi që u sollën me arka nga Tirana, dhe u mbyll para 13 viteve, me dëbim të kundërligjshëm e të padrejtë prej pallatit të saj në Prishtinë nga administrata e UNMIK-ut.
Pas kësaj date, gazeta Rilindja ka dalë kohë pas kohe me numra të jashtëzakonshëm protestues. Kjo gazetë historike, pasi doli në shtyp me numra specialë për ngjarjen historike të shpalljes së pavarësisë dhe të njohjeve ndërkombëtare që pasuan, i përmbylli botimet e më se 40 numrave protestues në 30 dhjetor të 2008-ës, me numrin e festës së Vitit të Ri 2009, bashkëshoqëruar me paralajmërimin në ballinë: “Duke besuar në sundimin e ligjit në shtetin e Kosovës, presim që nga numri i ardhshëm Rilindja të dalë përditë.” /tesheshi.com/
