Një tjetër investim është bërë nga miliarderi i famshëm Bill Gates, i cili këtë herë ka “vënë baste” për pronat e paluajtshme, konkretisht për një Palazzo Roman të shekullit të 17-të në zemër të qytetit të përjetshëm.
Themeluesi i Microsoft-it u bashkua me Princin e Arabisë Saudite Alwaleed bin Talal për të investuar së bashku në pronën historike të Romës.
Grupi Four Seasons Hotels and Resorts, i kontrolluar nga Bill Gates përmes Cascade Investment LLC, së bashku me investitorin miliarder saudit pagoi një pagesë paraprake prej 21 milion dollarë nga çmimi prej 170 milion dollarësh për Palazzo Marini.
Ndërtimi i saj filloi në vitin 1650 – por nuk u përfundua – nga skulptori, piktori dhe arkitekti i famshëm italian Gian Lorenzo Bernini dhe gjatë shekujve priti shumë personalitete të rëndësishme të Italisë.
Përfshin katër blloqe dhe është vetëm pak metra larg atraksioneve të mëdha të Romës si Shatërvani i Trevit dhe Shkallaret Spanjolle. Four Seasons thuhet se ka shpenzuar 120 milionë dollarë për të rinovuar ndërtesën dhe për ta kthyer atë në një hotel luksoz, i cili do të ketë më shumë se 100 dhoma dhe ka të ngjarë të përfshijë hapësirë për një qendër konventash, ndërsa ka gjithashtu plane për një qendër masive spa dhe fitnesi.
Sipas Daily Beast, kati përdhe i pallatit ishte kthyer në një dyqan pop-up të Ikea-s, duke u shitur produktet e saj të njohura banorëve të Romës që nuk mund të vizitonin dyqanet më të mëdha të zinxhirit në periferi. Katet e sipërme strehojnë restorantin për anëtarët e parlamentit italian, i cili është disa blloqe më larg.
Deri para pak kohësh, Gates kishte shprehur interes për një tjetër pronë, Hotel Danieli në Venecia. Së bashku me princin saudit, biznesmeni shpresonte ta kthente pronën e Venecias nga një hotel i koleksionit luksoz Marriott në një “Four Seasons” deri në vitin 2024.
Megjithatë, dyshja e investimeve u kritikua kur punësuan inxhinierin francez Pierre-Yves Rochon për të marrë përsipër projektin në vend që t’i drejtoheshin një kolegu italian. Me më shumë se 70% të rezidencave në Venecia në pronësi të investitorëve të huaj, mendimi që një nga hotelet më të vjetër të qytetit të jetë nën “kontrollin” amerikan, saudit dhe francez, ka shkaktuar një reagim të ashpër.
Në janar, megjithatë, u konfirmua se Giuseppe Statuto Group do të ruante pronësinë e hotelit pasi kishte siguruar 330 milionë euro në financim.
Nuk ka asnjë fjalë se kur do të fillojë puna e rinovimit në hotelin e ri të Gates, por me një buxhet kaq bujar, ndërtesa historike me siguri do të shohë një përmirësim të madh. /tesheshi.com/
