Fullani fiton lirinë e plotë: gjykata e shpall të pafajshëm

Gjykata ka shpallur te pafajshëm Adrian Fullanin, ish-Guvernatorin e Bankës së Shqipërisë, arrestuar më shumë se një vit më parë me akuzën e shpërdorimit të detyrës, pas një vjedhje disamilionëshe në këtë bankë.

Më saktësisht, Fullani u akuzua se nuk ka mundur të pengojë grabitjen e madhe. Arrestimi i tij u konsiderua i bujshëm për vetë personin që ai përfaqson: një njeri i dhënë pas jetës së shtrenjtë, që gjithnjë dyshohej se abuzon me fondet publike.

Një pjesë e shoqërisë civile nuk e shikonte atë si fajtor për vjedhjen gjigande, por si një grykës që duhej ndëshkuar për milionat që përfitonte si guvernator banke, me rroga marramendëse për veten, e lidhur kjo ngushtësisht me stilin e jetës që bënte.

Prokuroria kishte kërkuar 5 vjet heqje lirie për të, por gjykata e ka shpallur të pafajshëm.

Fullani gjykohej në gjendje të lirë, ndërsa qëndrimi i tij në qeli pas arrestimit, nuk zgjati shumë.