Në një intervistë ekskluzive për gazetën italiane Corriere della Sera, kryeministri i ri i sirian, Mohamed Al-Bashir, u bëri thirrje bashkëatdhetarëve refugjatë që të kthehen në vendin e tyre.
“Një nga qëllimet kryesore të qeverisë së re është të kthejë në vendin e tyre miliona refugjatë sirianë që janë jashtë vendit, sepse përvoja e tyre dhe kapitali i tyre njerëzor do të lejojë që Siria të lulëzojë përsëri,” theksoi Al-Bashir dhe shtoi: “Unë bëj apel për bashkatdhetarët tanë që ndodhen jashtë vendit: Siria është një vend i lirë që ka rifituar dinjitetin dhe krenarinë e saj. Ndaj, kthehuni!”
“Qëllimi i qeverisë së re siriane është të rivendosë stabilitetin dhe sigurinë në të gjitha qytetet e vendit. Ne jemi muslimanë, por sjellja e gabuar e disa grupeve islamike ka bërë që shumë në Perëndim t’i barazojnë muslimanët me terrorizmin. Kishte qëndrime të gabuara dhe mungesë mirëkuptimi. Kuptimi i Islamit, një fe e drejtësisë, është keqinterpretuar. Ne i përkasim Islamit dhe pikërisht për këtë do të garantojmë të drejtat e të gjithë popujve dhe banorëve të Sirisë”, theksoi ai.
Shqetësimi për ekonominë
Kryeministri i përkohshëm u shfaq i shqetësuar për rrjedhën e ekonomisë. “Situata ekonomike është veçanërisht problematike”, tha ai.
Lidhur me kohëzgjatjen e qeverisë së re, Al-Bashir tha: “Do të qëndrojmë vetëm deri në mars të vitit të ardhshëm. Borxhi financiar është i madh dhe sfida gjigante, por ne kemi përvojën e Idlibit, ku ia dolëm. Një rajon nuk është e njëjta gjë si i gjithë vendi, por ne mund ta përmirësojmë Sirinë. Do të duhet kohë, por do ia dalim”.
Në të njëjtën kohë, ai tha se do merren në përgjegjësi ata që kanë kryer krime gjatë revoltave të vitit 2011, “persona që zhdukën nëpër burgje mijëra qytetarë”. “Në shumicën e rasteve, përgjegjësitë e tyre dëshmohen nga organizatat ndërkombëtare dhe OJQ-të. Ata do të gjykohen sipas ligjit aktual”, tha al-Bashir.
Së fundi, kryeministri i ri sirian nuk iu përgjigj pyetjes së Corriere della Sera duke i kërkuar të sqarojë nëse “ata janë të gatshëm të nënshkruajnë paqe me Izraelin dhe në të njëjtën kohë nëse i konsiderojnë Iranin, Hezbollahun dhe Rusinë si armiq”. /tesheshi.com/
