Nga Ermir Hoxha
Edvin Zhak(Edwin Jacques) është ndër ata autorë të huaj që është marrë gjerë e gjatë me historinë e Shqipërisë, dhe ku, sa i përket datës së çlirimit, e vë atë më 29 nëntor. Por kjo nuk e rendit atë te “të majtët” në narrativën historike, përkundrazi. Zhak është njëherësh ndër ata historianë që 6 muajt e fundit të luftës i përshkruan si “luftës civile”, tezë e preferuar e narrativës së të së djathtës.
Dhe vërtet që ajo ka qenë një përballje komunisto-nacionaliste (Balli dhe Legaliteti), shoqëruar me shumë viktima në një vëllavrasjeje me sfond ideologjik me synim pushtetin e pasluftës, por fakti se populli i thjeshtë nuk është përfshirë në të, pra nuk kemi dhe konflikt të pastër civil, e bën të cunguar të quajturën “luftë civile”.
Nga ana tjetër, Edvin Zhak, 29 nëntorin e quan dhe “Uzurpim të Shqipërisë nga marksistët”. Në kapitullin me këtë titull të veprën e tij “Shqiptarët, historia popullit shqiptar që nga lashtësia e deri në ditët e sotme”, Zhak shkruan: Më 29 nëntor 1944, partizanët çliruan qytetin e fundit shqiptar, Shkodrën, duke i ndjekur jashtë vendit trupat e fundit gjermane…
Më 29 nëntor 1944, të nesërmen e Ditës tradicionale të Pavarësisë, Enver Hoxha marshoi së bashku me trupat triumfalisht në Tiranë, duke marrë në dorë frenat e gjithë vendit.
Më tej, Zhak thekson faktin se Shqipëria ishte i vetmi shtet europian që përqafoi komunizmin pa ndërhyrjen e drejtpërdrejtë të trupave sovjetike. /tesheshi.com/
