Në fillim të këtij viti, Rachael Farrokh bëri një thirrje të dëshpëruar, e cila i drejtohej gjithë botës për ta ndihmuar në betejën e ashpër kundër anoreksisë, ndërsa tani ajo punon për të ndihmuar të tjerët.
Kur Rachael postoi një video në YouTube në muajin prill peshonte 40 paund (rreth 19 kilogramë) dhe ishte në prag të vdekjes. Në videon ajo bënte apel për ndihmë, ndërsa shfaqej si një skelet, pa mish dhe vetëm me kocka. Pavarësisht pamjes së saj të tmerrshme, dëshira për të jetuar ishte shumë më e madhe. Ajo kishte nevojë për para, në mënyrë që të përballonte trajtimin dhe e gjithë bota reagoi e iu përgjigj kërkesës së saj, duke mbledhur rreth 200.000$, nëpërmjet dhurimeve në faqen GoFundMe.
Gjatë muajit maj Farrokh tha për CNN se e dinte që kohën e kishte të limituar e se pa ndihmën e njerëzve nëpër botë, ajo do të humbte betejën kundër sëmundjes e shumë shpejt do të vdiste. Që prej asaj kohe, vajza e re bëri një ndryshim dhe transformim të paimagjinueshëm.
Pas trajtimeve të njëpasnjëshme në vende të ndryshme të botës, Farrokh këtë javë udhëtoi për në Uashington, ku mori pjesë në takimin vjetor March Against Eating Disorders (marshimi kundër çrregullimeve të ngrënies).
Gjatë marshimit ajo tha për televizionin lokal NBC4 në Los Angeles se është gati të ndihmojë edhe persona të tjerë që vuajnë nga e njëjta sëmundje sikurse dhe ajo. “Unë kam një familje të madhe që quhet botë. Ata më dhanë një përqafim të madh. Mendja ime është shumë më e qartë tani dhe mendimet i kam të sqaruara”,- tha Farrokh./tesheshi.com/
