Nga Anila Dushi
Dy kandidatet për Bashkinë e Shkodrës, Keti Bazhdari e Voltana Ademi, kanë përshëndetur njëra- tjetrën publikisht duke u takuar për pak sekonda, ku i kanë dhënë dhe dorën njëra-tjetrës.
Kjo ndodhi gjatë një aktiviteti të vajzave të Medresesë “Haxhi Sheh Shamia”, të shtunën pasdite në teatrin “Migjeni”, ku ishin ftuar dhe dy zonjat. Në një moment ato i kanë shtrënguar duart njëra-tjetrës ndërsa Bazhdari ka uruar dhe deputeten më të re të parlamentit shqiptar Irma Kopliku e cila ka marrë mandatin e Ademit dhe që ndodhej në krah të saj në shfaqje.
Në fakt, ka qenë Bazhdari ajo që i është afruar rivales në garën e 21 qershorit dhe të dyja janë shfaqur të qeshura dhe janë përshëndetur ngrohtësisht duke dhënë kështu mesazhin e një sjelljeje qytetare e emancipuese, që shkon përtej ndasive politike.
Shkodra, qyteti i kulturës dhe emancipimit, po e pasqyron këtë dhe gjatë fushatës elektorale. /tesheshi.com/
