Gruaja e kryeministrit Edi Rama, Linda Rama, po qëndron në Prishtinë si pjesë e forumit Global Women Club Kosovo, ku po trajtohen problemet e integrimit të gruas shqiptare në Evropë.
Forumi i cili po mbahet nën kujdesin e Anita Haradinajt, gruas së kryeministrit të Kosovës, ka mbledhur shumë gra nga politika, shkenca, shoqëria civile, arti e të tjera fusha.
Por një zë i duartrokitur dhe gjithëpërfshirës ishte ai i zonjës Rama, e cila preku disa aspekte të forcës së grave të Kosovës, të cilat i konsideron si për lakmi.
Ajo tregon në mënyrë kronologjike mënyrën se si e ka përfytyruar një grua nga Kosova, në një kohë kur kontaktet mes dy shteteve tona i ngjante atyre të Koreve të sotme.
Zonja Rama rezonoi mbi dy figura emblematike të grave, atë të Shotë Galicës, një luftëtare e shquar po aq sa burri i saj, dhe Nexhmije Pagarusha, një zë i pëlqyer në të dyja anët e kufirit, si për kumbimin, ashtu edhe për mesazhin.
Por pa përmendur nuk kaloi as Vasfije Krasniqi- Goodman, heroina e gjallë e luftës kundër stigmatizimit të grave të përdhunuara.
“Përulem me respekt ndaj kurajos dhe kontributit të Vasfije Krasniqit. Është një kontribut jo vetëm për çdo vajzë viktimë të dhunës seksuale gjatë luftës, por edhe për çdo vajzë dhe grua viktimë të dhunës në familje apo të çdo lloj abuzimi e diskriminimi gjinor”, u shpreh ajo gjatë fjalimit të saj në forum.
I gjithë mesazhi u përmblodh rreth dy fjalëve që i kishte dëgjuar më së tepërmi gjatë kontaktit që kishte pasur me refugjatët nga Kosova në Shqipëri: Liri dhe shtëpi.
Për zonjën Rama, këto dy fjalë edhe sot janë litarë që as sot nuk duhen lëshuar. /tesheshi.com/
