Nga Donat Maloku
Barrikada e ashtuquajtur “Parku i paqes”, në urën kryesore mbi lumin Ibër, që ndan pjesën jugore dhe veriore të Mitrovicës, do të jetë një prej temave kryesore në raundin e ri të bisedimeve që do të zhvillohen më 24-25 gusht të javës së ardhshme në mes delegacionit të Kosovës dhe Serbisë në Bruksel.
Për këtë çështje është diskutuar edhe në takimet tjera por nuk është arritur marrëveshje mes palës kosovare dhe serbe.
Qeveria e Kosovës beson se në takimin e radhës do të arrihet një marrëveshje tre palëshe dhe se barrikada mbi lumin Ibër do të largohet gjatë këtij viti.
Analistët shprehen se “Parku i Paqes”, do të duhej të ishte çështje e brendshme e shtetit të Kosovës, mirëpo sipas tyre dialogu i Brukselit edhe punët e brendshme i ka konvertuar në çështje të jashtme.
Ndërsa, drejtues komunal të Mitrovicës thonë se barrikada duhet të largohet sa më shpejt pasi është kërkesë e kahmotshme e qytetarëve të Mitrovicës që ata të lëvizin lirshëm.
Ministrja për Dialog, Edita Tahiri, ka konfirmuar për portalin “Te Sheshi”, se në takimin e radhës në Bruksel do të bisedohet për largimin e të ashtuquajturit ‘Parku i Paqes’, duke thënë se ka një marrëveshje parimore mes Kosovës dhe Brukselit për këtë çështje.
“Edhe në takimin tre palësh pritet të arrihet marrëveshje. Një nga elementet është që më datë 1 tetor të këtij viti të hiqet barrikada. Bashkimi Evropian do të fillojë rinovimin e Urës që do të zgjatë gjashtë muaj, kurse në pranverë ura do të jetë e hapur edhe për vetura”, ka deklaruar Tahiri.
Njohësi i rrethanave politike, Albinot Maloku, ka deklaruar për portalin “Te Sheshi”, se largimi i të ashtuquajturit “Parku i Paqes” është paralajmëruar disa herë nga ministrja për Dialog, Edita Tahiri, duke dhënë edhe afate se do të largohet.
“Nisur nga fakti që hapësira ku gjendet “Parku i Paqes” është në Kosovë, ajo do të duhej të ishte çështje e brendshme e shtetit të Kosovës, mirëpo Dialogu i Brukselit edhe punët e brendshme i ka konvertuar në çështje të jashtme. Se në çfarë forme do të mund të gjendej kompromisi për heqjen e kësaj barrikada ndarëse, këtë mund ta di veç znj.Tahiri, por që dyshoj në suksesin e kësaj teme gjatë këtyre bisedimeve. Barrikada “Parku i Paqes” është simbol i ndarjes së vendit, e po ashtu edhe Asociacioni i Komunave me shumicë serbe është hap i ndarjes së vendit. Pra të dy çështjet kanë të njëjtën simbolik e synim. Nisur nga kjo të dy çështjet janë të ndërlidhshme mes veti për nga synimi, dhe këtu çdo kompromis do të jetë i dëmshëm për vendin”, ka deklaruar Maloku.
Emir Azemi, zëvendëskryesues i Kuvendit Komunal të Mitrovicës veriore në një prononcim për portalin “Te Sheshi”, ka thënë se kjo barrikadë duhet të hiqet sa më parë, pasi kërkesë primare e qytetarëve është liria e lëvizjes dhe kjo çështje nuk duhet të politizohet pafund.
“Duke marrë parasysh nevojën urgjente për liri të lëvizjes dhe respektim të vlerave fundamentale evropjane, presim që kjo barrikadë të largohet. Kjo ka qenë kërkesë e kahmotshme e qytetarëve atje por politika të caktuar e kanë pamundësuar largimin e saj dhe hapjen e urës për të gjithë”, ka deklaruar Azemi.
Kryetari i Mitrovicës, Agim Bahtiri, pati deklaruar kohë më parë se më së largu në qershor të vitit 2015, do të largohet barrikada e vendosur nga serbët, madje ishte shprehur se “vetë ai do të dalë aty për ta larguar”.
Por, e gjitha mbeti vetëm një deklarim pasi as barrikada nuk u largua e as kryetari Bahtiri nuk doli që ta largojë atë.
Derisa, të arrihet marrëveshje tre palëshe në Bruksel nuk dihet cili do të jetë fati i barrikadës.
Ndryshe, “Parku i Paqes” ka zëvendësuar barrikadën e mëparshme me rërë e gurë në urën kryesore mbi lumin Ibër , që ishte vendosur nga banorët lokal serbë në korrik të vitit 2011, në shenjë kundërshtimi ndaj përpjekjeve të Prishtinës zyrtare për të vendosur autoritetin në veri të vendit dhe për të marrë nën kontroll pikat kufitare 1 dhe 31, në kufi me Serbinë./tesheshi.com/
