Nga Blendi Gashi
Dy deputetët, që në partitë e tyre njihen si opozitarë, Vjosa Osmani (LDK) dhe Ilir Deda (VV), kanë propozuar një marrëveshje pesëpikëshe për pesë liderët kryesorë në vend të pozitës dhe opozitës. Osmani dhe Deda, të shqetësuar me eskalimin e situatës politike, thonë se po rrezikohet edhe siguria e qytetarëve.Thonë se dhuna nuk është zgjidhje prandaj duhet një marrëveshje.
Opozita hesht!. Por, si vlerësohet kjo iniciativë nga ish deputet dhe analistë.
Ish-deputeti i PDK-së, Gani Koci, i ka quajtur ‘shpëtimtarë të vendit’, dy deputetët në fjalë, por ka thënë se nuk e di sa do të shitet iniciativa e tyre.
“Shpëtimtarët e popullit dhe të Kosovës! Më pëlqen iniciativa e tyre! Me diçka duhet të jenë në qendër të vëmendjes, dy deputet e dy subjekteve, që nuk janë të knaqur me subjektin që i përkasin!#prodhimi# Made in Vjosa Osmani dhe Ilir Dedaj… Nuk di sa do të shitet!!!!”, ka deklaruar Koci.
Njohësi i rrethanave politike në vend, Lumir Abdixhiku e quan planin e Dedës dhe Osmanit korrekt, konkret dhe të realizueshëm.
“Një propozim konkret, korrekt dhe i bëshëm – ky nga Vjosa e Iliri. Ndjekja e gjithë rrugëve institucionale – çfarëdo qofshin ato – mbetet rruga më e sigurt dhe e vetme, për shmangie nga theqafja e për konsiderim të marrëveshjeve paraprake”, ka thënë Abdixhiku.
Analisti, Astrit Gashi thotë se plani i Dedës dhe Osmanit është një veprim shumë i mirë përpara.
“Nëse asgjë tashmë dikush ka hartuar një dokument- për të cilin dhe mbi të cilin mund të diskutohet. Të tjerët poashtu kanë të drejtë të inicojnë e hartojnë propozime- me rëndësi që gjërat të nisen të vendosën në tavolinë!. Pra është një hap përpara dhe për këtë i përgëzoj të dy deputetët!”, ka deklaruar Gashi.
Ndryshe, iniciativa e deputetëveka pesë pika. Nëtë parashihet që Kuvendi i Kosovës ta themelojë një komision hetimor të udhëhequr nga opozita për ta shqyrtuar Marrëveshjen për Demarkacionin e Kufirit me Malin e Zi.
Në lidhje me Asociacionin e Komunave Serbe aty thuhet se Kuvendi i Kosovës do t’i zgjedhë dy anëtarët e rinj të Gjykatës Kushtetuese me qëllim që vendimi i saj për kushtetutshmërinë e parimeve për themelimin e Asociacionit të Komunave Serbe të bëhet me Gjykatë Kushtetuese të kompletuar.
Portali tesheshi.com ka bërë përpjekje të marrë një qëndrim nga partitë opozitare për planin e Dedës e Osmanit, por asnjëra prej nuk ka kthyer përgjigje.
Ndryshe, asnjë fjalë nuk e kanë thënë as Visar Ymeri i VV-së, Ramush Haradinaj i AAK-së e Fatmir Limaj i Nismës për Kosovën, në manifestimin që mbajtën sot për planin e dy deputetëve të lartcekur për dalje nga kriza.
/tesheshi.com/
