Nga Donat Maloku
Përjashtim i delegatëve të diasporës, ruajtje e derës me dy truprojë, largimi i Kuvendit nga delegatët e diasporës, largimi i mediave nga salla ku po mbahej Kuvendi, votim me aklamacion dhe duartrokitje dhe kritika të tjera të shumta, ishin disa nga ngjarjet që e konkretizuan Kuvendin zgjedhor të VIII të LDK-së. Ky Kuvend nxorri fitues sërish Isa Mustafën e cili edhe për një mandat do ta udhëheq këtë parti.
Derisa, Mustafa e quan legjitim zgjedhjen e tij, Vjosa Osmani e cila u diskualifikua nga gara për të qenë kundërkandidate e Mustafës thotë se nuk e njeh Mustafën si kryetar të partisë.
Të gjitha ngjarjet që ndodhën në Kuvendin e VIII të LDK-së kanë nxitur reagime të ndryshme.
Por, si e shohin analistët politik rizgjedhjen e Mustafës edhe për katër vite në krye të LDK-së.
Avni Zogiani ish udhëheqës i OJQ-së ÇOHU, duke komentuar zgjedhjet në LDK, dhe deklarimet e ndryshme se me zgjedhjen e Mustafës është thyer statuti i kësaj partie, ka thënë se statutet e partive janë dokumenta koti që nuk e obligojnë askënd.
“Nuk mundet me ndryshuar kryet e partisë pa ndryshuar mënyra e funksionimit, edhe kur ndryshon, prapë ndryshimi është reversibil sepse nuk është përmbajtësor”, ka deklaruar Zogiani.
Analisti, Albinot Maloku, duke komentuar zhvillimet që ndodhën në Kuvendin e VIII thotë se kjo parti nuk e ka në planë hapjen, reformën, nxitjen e mendimit të ri, duke thënë se befasia premtuese nuk ndodhi.
“Këto lloj zgjedhjesh nuk i ngjajnë demokracisë, mirëpo si zgjedhje duhet të njihen. Jam i mendimit, por edhe duke u nisur nga praktika e veprimit politik të kryetarit të ri të LDK-së, Isa Mustafa, ai nuk do ti largon këta që provuan demokracinë brenda LDK-së, mirëpo në një të afërm, ai do ti zbeh maksimalisht e deri në largim ata që po e mbajnë z.Mustafa në ‘kokrra’ për shkak të fuqisë së tyre brenda LDK-së. Kjo pritet të shihet”, ka shtuar ai.
Analisti tjetër, Astrit Gashi përmes një shkrimi në Facebook, pas zgjedhjes së Mustafës në krye të LDK-së ka thënë se në asnjërën nga Partitë Popullore Evropiane kryetari nuk është zgjedhur me aklamacion- me votim të hapur. “LDK është “sui generis”. Me mënyrën e votimit të sotëm LDK dhe Isa Mustafa poshtëruan vetën, lënduan demokracinë e partisë dhe të ardhmen e saj politike. Fitues nga ky Kongres dalin konkurentët politik të LDK-së. Në tabiatin e mënyrës së votimit të sotëm: Hasta la Vista, LDK!”, ka shkruar ai. /tesheshi.com/
