Nga Blendi Gashi
Asociacioni i Komunave me shumicë serbe ndryshe siç po e quan opozita ‘Zajednica’ është tema që ka përplasur fort pushtetin dhe opozitën.
Nënshkrimi i kësaj marrëveshje nga kryeministri Isa Mustafa po kundërshtohet fortë nga tri partitë opozitare VV, AAK, NISMA, për çka Kuvendi vazhdon të mbetet i bllokuar.
Opinioni ka pritur një reagim të tillë nga Lëvizja ‘Vetëvendosje’, parti kjo që prej është futur në Kuvend, ka qenë zëri më i fuqishëm opozitar, por askush nuk ka pritur që AAK e Ramush Haradinajt, të bëhet bashkë me VV-në që të bllokojnë Parlamentin, pasi partia e Ramushit ka qenë pjesë e bisedimeve me Serbinë.
Opozita kosovare e cila për më shumë se dy muaj po e mban të bllokuar Kuvendin thotë se këtë gjë po e bën me kauzën për ta mbrojtur shtetin, pasi ‘Zajednicën’, e shohin si pushtet të tretë në vend.
Por, shtrohet pyetja, a do ta nënshkruante Haradinaj, ‘Zajednicën’, nëse do të ishte kryeministër i vendit, pra në një mënyrë t’i thoshte JO edhe miqve ndërkombëtarë pasi kjo marrëveshje është përkrahur edhe nga ta.
Analistë dhe gazetarë thonë se edhe Haradinaj po të ishte në pozitën e Mustafës pa hezitim do t’i thoshte PO ‘Zjednicës’, andaj reagimet e tij shihet më shumë për pushtet.
Analisti politik, Islam Krasniqi, thotë se sikur të ishte kryeministër Haradinaj, nuk do të kishte menduar dy herë dhe do të nënshkruante marrëveshjen për Asociacionin.
“Duke u bazuar në marrëveshjet e vitit 2013, me Serbinë në Bruksel, të cilat e dëmtonin sovranitetin e vendit, AAK-ja i ka përkrahur këto marrëveshje, dhe nuk i ka kundërshtuar edhe pse e ka ditur peshën e tyre. Pavarësisht kundërshtimeve të tij që i bënë si show mediatik ai do të nënëshkruante marrëveshjen për Asociacionin sepse e ka pranuar pavarësinë në bazë të pakos së Ahtisarit, e cila ka pasur shumë mangësi dhe më të cilën serbët janë superior ndaj qytetarëve të Kosovës. Megjithatë, lideri i AAK-së ka të drejtë që e kundërshton këtë marrëveshje, sepse është shumë të demshme për vendin”, ka deklaruar Krasniqi, për tesheshi.com.
Gazetari i njohur, Milaim Zeka ka thënë për tesheshi,com se edhe Ramushi po të ishte në pozitën e 
kryeministrit do t’i thoshte PO, ‘Zajednicës’, edhe pse e kundërshton fuqishëm tani.
“Nuk e kanë problem as pozita as opizita çështjen e Zajednicës as të Malit të Zi. Këta e kanë veç një problem për të cilin të gjithë bashkohen duke e përjashtuar LDK-në, e ai problem është Gjykata Speciale. Këta krejt këto gjëra janë duke i bërë me qëllim me shty ekzekutimin e Speciales.
Krejt kemi me qenë Zajednicë në Bashkimin Evropian. Në momentin që hyjmë në BE shumë gjëra të pavarësisë zhduken”, ka deklaruar Zeka.
Analisti, Nexhmedin Spahiu, thotë se nuk mund ta dijë saktë nëse Haradinaj do ta nënshkruante Asociacionin po të udhëheqte me Qeverinë, por shton se do të ishte situatë ndryshe me të në krye të vendit.
“Ramushi dhe Isa Mustafa dallojnë diametralisht. Ramushi kishte me qenë më i përshtatshëm me i udhëheq bisedimet në Bruksel. AAK e ka votuar në parim marrëveshjen me Serbinë. Me pas qenë Ramushi kryeministër kishte me qenë tjetër situatë”, thotë Spahiu për tesheshi.com.
Ndryshe, Ramush Haradinaj, ditë më parë në mënyrë të prerë ia ka bërë të qartë pushtetit se zhbllokimi i Kuvendit do të ndodhë vetëm nëse anulohen marrëveshjet nga versioni ekzistues i saj.
“Ne jemi në qëndrimet e njëjta. Ne do të vazhdojmë të kundërshtojmë dy marrëveshjet. Anulimi i marrëveshjes për Asociacionin është dalje nga gjendja aktuale. Kryeministri Mustafa duhet me i anulu sa më shpejt dhe më pastaj të ulemi të bisedojmë. Ne si opozitë nuk jemi në pozitë të lehtë. Ajo që po ndodh në Parlament është një keqe e vogël që po ndodh për me ndal një keqe të madhe. Do të rrijmë në rrugë, do të bëhemi barrikadë që të mos zbatohen këto marrëveshje”, ka deklaruar Haradinaj. /tesheshi.com/
