Shqiptarët e Preshevës do ta presin me protesta për arsimin, Kryeministrin e Serbisë, Aleksandër Vuçiç, i cili viziton kryeqendrën e Luginës vetëm për çështjen e refugjatëve pasi aty ndodhet qendra kryesore e grumbullimit.
Disa grupime qytetarë kanë paralajmëruar një protest me moton: “Duam libra, drejtësi dhe liri!”. Por protesta nuk ka gjetur në një mendje të gjithë liderët politik të shqiptarëve. Protestën e kishte paralajmëruar javën e kaluar edhe liderët e Luginës në selinë e KKSH-së.
Pas bllokimit të teksteve mësimore për nxënësit e Luginës, donacion nga Ministria e Arsimit, Shkencës dhe Teknologjisë së Kosovës, spektri politik i Luginës së Preshevës kërkon marrjen e hapave të mëtejshme. Edhe pas kërkesës me shkrim të Këshillit Kombëtar Shqiptar (KKSH) dërguar terminalit doganor, ku po mbahen 104.069 teksteve mësimore, me një vlerë mbi 203 mijë euro, ky organ nuk ka marrë përgjigje për lejimin e përdorimit të tyre.
Sipas informacionit të konfirmuar, liderët të pakënaqur me vendimin për moslejim të teksteve mësimore në gjuhën shqipe, për nxënësit filloristë të Luginës së Preshevës, kanë kërkuar që të organizohet një protestë me kërkesën që shqiptarëve t’i jepet e drejta për të mësuar me tekste adekuate.
Spektri politik ka apeluar tek autoritet kosovare që të vendosin reciprocitet duke mos lejuar që tekstet mësimore nga Serbia për pakicën serbe në Kosovë të hyjnë në këtë vend.
Lidhur me situatën e krijuar javën e kaluar në selinë e KKSH-së është zhvilluar edhe një takim me drejtorët e shkollave.
Kryetari i këtij organi, Jonuz Musliu ka deklaruar për agjencinë e lajmeve “Presheva Jonë” se “përkundër kërkesave tona të vazhdueshme dy kamionët me libra që erdhën më 9 shtator në Luginë, policia po i mban të bllokuar në terminalin doganor në Preshevë. Librat e kanë vendin në shkolla e jo në polici”.
Liderët e subjekteve politike dhe organizatave jo-qeveritare të Luginës së Preshevës janë duke shqyrtuar në qendër të Preshevës, pikërisht para komunës, aty edhe ku u largua lapidari i UCPMB-së, për të protestuar me moton: Duam libra, drejtësi dhe liri si dhe kundër politikës diskriminuese të regjimit të Beogradit në Luginë.
Protesta po mbështetet edhe nga veteranët e luftës (OVL e UCPMB-së).
/tesheshi.com/
