Kryetari aktual i Prishtinës, Shpend Ahmeti, njëherit kandidat i Vetëvendosje-s për mandatin e dytë është forcuar në prag të balotazht të 19 nëntorit, pasi ka lidh marrëveshje koalicioni me AKR-në e Pacollit.
Lajmi është konfirmuar në një konferencë për media nga Ahmeti si dhe nga Selim Pacolli, kandidat i AKR-së për kryetar të Prishtinës.
“Jemi këtu për të zyrtarizuar vendimin e bashkëpunimit me AKR-në edhe për një mandat. Jemi dakorduar për program të përbashkët. Zotohemi se së bashku me z. Pacollin dhe AKR-në se do të punojmë për reformimin e kryeqytetit”, ka thënë Ahmeti.
Në anën tjetër, Pacolli ka thënë se ka qenë i hapur të bashkëqeverisë me cilindo subjekt politik që merr në konsideratë programin e tyre.
“Programi im nuk mund të presë edhe katër vjet që të realizohet, ndaj bashkë me Shpend Ahmetin kemi bërë programin më të mirë për qytetarët e Prishtinës”, ka thënë Pacolli.
Ahmeti do të përballet me Arban Abrashin e LDK-së në balotazhin e 19 nëntorit. Në zgjedhjet lokale të mbajtura më 22 tetor, në raundin e parë Ahmeti mori 43.32 për qind apo 37572 vota, ndërsa Abrashi 35.89 për qind apo 31126 vota. Pacolli pati 10.40 për qind apo 9022 vota. /tesheshi.com/
