Mbrëmja e së dielës ka qenë fatale për dy makina të ushtrisë turke që po lëviznin në Dallëxha (Dağlıca), në provincën juglindore të Hakkarisë. Ato kanë rënë në pritën me mina të PKK-së, organizatës terroriste kurde, si pasojë e së cilës kanë humbur jetën 16 ushtarë, e janë plagosur shumë të tjerë. Ndaj të plagosurve është qëlluar më pas me breshëri zjarri nga militantët e PKK-së të fshehur përreth, ndërsa këtyre të fundit u ka ardhur në ndihmë dhe një shi i furishëm.
PKK-ja e përshkroi sulmin si një “akt sabotazhi” në një njoftim në faqen elektronike të Forcave të Mbrojtjes Popullore (HPG), krahut të saj ushtarak.
Pas sulmit të PKK-së ka patur një kundërpërgjigje nga ushtria turke. Avionët F-16 dhe F-4 kanë goditur 12 objektiva në zonën e Dallëxhasë (Dağlıca) dhe në veri të Irakut.
Kryeministri turk ka thirrur menjëherë një takim të jashtëzakonshëm të krerëve të sigurisë, pasi ka ndërprerë ndjekjen e një ndeshjeje të ekipit kombëtar të futbollit në Konja. Takimi ka përfunduar pas dy orësh, pa një deklaratë pasuese.
Ndërkaq, presidenti turk, Rexhep Tajjip Erdogan, e ka konfirmuar sulmin ndërsa po jepte një intervistë të drejtpërdrejtë televizive në kanalin ATV. “Eshtë kryer një sulm me mina. Jemi shumë të pikëlluar.” Ai deklaroi se lufta ndaj terrorit do të vazhdonte me më shumë vendosmëri pas këtij sulmi.
Aktiviteti terrorist i PKK-së ka patur një përshkallëzim që nga korriku i këtij viti, pas një periudhe të gjatë qetësie. /tesheshi.com/
